Gisuspetsahan pyramiding scheme gironda sa NBI

CEBU, Philippines — Gironda sa mga tinugyanan sa National Bureau of Investigation Central Visayas ang usa ka establisamento nga gidudahang nalambigit sa pyramiding scheme  diha sa Dakbayan sa Lapu-Lapu human sa reklamo sa pipila ka mga tawo nga gipasaligan nga modoble ang ilang kwarta nga gi invest.

Ang gironda mao ang  JStore Innovation Worldwide nga nahimutang sa Brgy. Pajo, Lapu-Lapu City. Ang operasyon gihimo niadtong Miyerkules sa May 25, 2022.

Matud pa dunay mga nangreklamo nga investors human wala na mabalik ang ilang gibubo nga puhonan nga gipasalig sa kompanya nga madoble.

Atol sa pagpangronda sa NBI-7 pinasikad sa search warrant nga giluwatan ni Presiding Judge Ruelo Saladaga sa Branch 69 sa Regional Trial Court, Lapu-Lapu City nasakmit ang mga electronic equipment nga naglakip sa mga personal nga computers ug mga dokumento diha mismo sa maong headquarters sa kompaniya.

Matud pa ni Agent-in-Charge Arnel Pura daghan silang nadawat nga reklamo batok sa maong kompanya tungod kay nationwide ang operasyon niini.

Apan kasagaran sa mga incorporators taga Dakbayan sa Lapu-Lapu.

Sumala pa ni Pura, ang mga investors hatagan sila og mga products nga mobalor sa ilang gi invest nga kwarta sama sa coffee, beauty products, perfume ug uban pa.

Si Special Investigator 3 Agapito Guerran ang mga investors gisaaran og taas nga balik sa ilang investment apan ang tag-iya niini nga usa ka Joil Ocay, napakyas sa paghatag sa payouts ngadto sa mga nangreklamo.

Wala si Ocay sa iyang buhatan, hinungdan giimbitar ang dili mominos sa pito ka mga empleyado niini ngadto sa buhatan sa NBI-7 alang sa mga pangutana.

Ang NBI nagplanong mopasaka og kasong paglapas sa The Securities Regulation Code, Cybercrime Prevention Act of 2012 ug syndicated estafa under presidential decree 1689. —Romeo Limpangog/IBM (BANATNEWS)