Misting ug fogging operation vs dengue gipangusgan
CEBU, Philippines — Nagpadayon ang Cebu City Health Department sa ilang Anti-Dengue Operation kini aron mapakunhod ang kaso sa dengue sa siyudad sa Sugbo human kini misaka karong tuiga ug daghan ang nakalas.
Kagahapong adlawa ang gitutukan sa kadagkuan sa Cebu City Health Department ang Sitio Cadaohan sa Barangay Talamban tungod may duha ka nag-positive sa dengue sa lugar ug naa say mga gipanghilantan.
Kini sama ni Marielle Narbasa, 23 anyos, kansang manghod nga nag-edad og 8 anyod duha ka adlaw na gihilantan, nakasinati kini og pagpanakit sa tiyan, lawas ug rashes sa lawas nga pipila sa sintomas sa dengue na sab sa gisulti sa CCHD. Aron masuta kun na-dengue ba iyahang manghod miadto sila sa Barangay Health Center aron ipaubos kini sa CBC kay nabalaka gyud sila ilabi na sa miaging tuig dunay na-dengue na sab sa ilahang pamilya.
“Sakit iyang tiyan, akong nakuanan mostly raba ingon ang kuan sa dengue ba unya naay rashes bitaw. Gahapon pa nag-start sa buntag bali karon mag two days na unya basin dengue ba kuyaw kaayo,” sigon ni Narbasa.
Si Dr. Jeffrey Ibones, Officer-in-Charge sa CCHD miaoy nga nag-house-to-house sila sa pagpangutana kun kinsay gipanghilantan tungod kay ang health center sa Barangay Talamban dunay CBC ug denuge NS1 kit mas maayo nga magpa-checkup gyud dayon aron malikayan ang dili maayong panghitabo.
Nabantayan nga dunay mga tubig nga napundo sa bottled water, lata, ug uban pa nga ilahang gipangayabo kay mahimo kining breeding site sa lamok. Duna say gihimong curtain impregnation ang CCHD sa mga kabalayan, misting ug search and destroy. Si Mercedita Monroid, residente sa Sitio Cadaohan nagpasalamat sa gihimo sa CCHD kay nabalaka gyud sila sa dengue ilabi na nga daghan og mga bata sa ilang lugar. Ang siyudad nakatala og 422 ka mga kaso ug 13 na ang namatay sa maong sakit sa nakalabay’ng lima ka buwan ning tuiga.
Mas daghan kini itandi sa samang mga buwan sa nanglabay nga katuigan maong naalarma ang mga otoridad. Ang Cebu City maoy dunay kinadaghanan og kaso sa tibuok Central Visayas. —Rowena Capistrano/IBM (BANATNEWS)
- Latest
