31 ka eskolar sa Talisay nakadawat na og allowance

CEBU, Philippines — Mokabat sa 31 ka mga tinun-an nga nalakip sa Cream of the Crop Program sa Dakbayan sa Talisay ang nakadawat sa ilang allowance.

Si mayor Gerald Anthony “Samsam” Gullas maoy nangunay sa paghatag niini alang sa mga eskolar.

Matud pa sa mayor nga naa pa lang sila sa 31 kabuok apan siya nipasalig nga sa iyang bag-o nga mandato nga gihatag sa Talisaynon iyang mapun-an ang mga eskolar.

Ang programa lakip sa 8-point agenda ni Gullas sa dihang nagsugod siya sa iyang unang termino isip mayor niadtong 2019.

Ang kadagkuan sa Department of Education (DEPED) sa Talisay ug ubang mga opisyales maoy gisangonan sa pagpili sa mga tinun-an nga angayan sa programa.

Gitinguha sa mayor nga wala sa iyang sakop o bisan kinsa nga politiko ang makahilabot sa pagpili sa tinun-an aron way pabor-pabor nga mahitabo.

Ang mga tinun-an nga mapilian adunay higayon nga makapili og tunghaan sa siyudad sa Sugbo ug sa gusto nila nga kurso nga kuhaon.

Ang Talisay maoy moabaga sa gastuhan aron ang mga ginikanan makaginhawa sa gastuhan sa ilang mga anak nga nagtungha.

“Angay gyud ni ipadayon na programa and rest assured that during my second term ato pa ning palambuon og mas palapdan pa ang Cream of the Crop Scholarship Program diri sa atong siyudad sa Talisay,” segun pa ni Gullas. MEL (BANATNEWS)