24,000 ka indibidwal nakadawat na sa hinabang
CEBU, Philippines — Kapin sa 24,000 ka inbidwal ang nakadawat na sa ilang financial assistance sa Persons with Disabilities (PWD) ug sa Tabang Alang sa Panginabuhi sa atong Trabahante (TAPAT) sukad sa pagbalik og apod-apod niini niadtong Mayo 13, 2022. Nasayran nga naabot na ngadto sa P82 milyones ang naapod-apod sa kagamhanan sa Dakbayan sa Sugbo alang sa maong katuyoan.
Ang maong gidaghanon sa mga beneficiaries nga nakadawat sa cash aid base kini niadtong Mayo 20, 2022 ug mosaka pa kini tungod kay magpadayon pa ang pag-apod-apod og hinabang.
Nasayran nga nagdungan ang distribution diha sa nagkadaiyang barangay.
Matud pa sa Cebu City Public Information nga ang mga empleyado sa city hall nga gikan sa naglain-laing departamento maoy nagsilbing disbursement officers.
Gihimo ang distribution diha sa mga gym, public schools ug sa ubang designated areas.
Base sa datos sa Department of Social Welfare and Services (DSWS) niabot ngadto sa 13,000 ka PWDs ang nakadawat og tag P2,000 nga financial assistance, samtang 11,000 ka beneficiaries ang nakadawat og tag P4,000 nga honorarium alang sa 10 ka adlaw nga pagpaubos sa TAPAT.
Gibutyag sa hepe sa DSWS Portia Basmayor nga aduna pay dugang hugna sa distribution diin giandam pa sa siyudad ang payrolls.
Nasayran nga naputol ang pag-apod-apod sa mga financial assistance gumikan kay naabtan kini sa election ban. Lakip sa naapektohan sa maong election ban ang pag-apod-apod sa mga ayuda alang sa naapektohan sa bagyong Odette. Adunay higayon nga ang kagamhanan sa Dakbayan sa Sugbo niapelar ngadto sa ulohang buhatan sa Commission on Elections alang sa maong katuyoan apan naabtan na kini sa piniliay. BDB (BANATNEWS)
- Latest
