Unom ka barangay sa Probinsiya sa Sugbo drug cleared na

CEBU, Philippines — Unom ka barangay sa tulo ka lungsod sa Probinsiya sa Sugbo ang gideklara nga drug-cleared sa Regional Oversight Committee on Barangay Drug Clearing niadtong Mayo 20, 2022.

Matud ni Leia Albiar-Alcantara, tigpamaba sa Philippine Drug Enforcement Agency-7 nga ang mga gideklara nga lugar naglangkub sa Barangay Baod, Barangay Kapingganon ug Barangay Botigues sa Bantayan; Barangay Kabalaasnan ug Pawa sa Lungsod sa Dumanjug; ug Barangay Polog sa Lungsod sa Consolacion.

Gibutyag ni Alcantar nga nikabat sa 1,215 na ka barangay ang drug-cleared tibuok rehiyon -7 ug lima na usab ka lungsod ang drug cleared.

Sa laing bahin, duha ka suspetsadong mamaligyaay og drugas ang nasikop sa kapolisan sa Dakbayan sa Talisay sa sunod-sunod nga operasyon.

Unang nadakpan niadtong Sabado sa gabii diha sa Lawaan 3 mao si Edmar Echavez Alegado alyas “Masoy”, 25-anyos, pintor, residente sa lugar.

Si Alegado giingong magkuhaan sa iyang drugas gikan sa sa ginganlan og “Boss” nga taga Barangay Duljo, Siyudad sa Sugbo.

Nasakmit gikan sa suspetsado ang 10 gramos nga shabu nga nibalor ngadto sa P68 mil. Sunod nga nasikop sa maong adlaw mao si Michael Manila Laurenciana alyas “Baki”, 32-anyos, usa ka technician sa Telcom, residente sa A. Lopez, Barangay Calamba, Siyudad sa Sugbo.

Nakuha gikan sa suspetsado ang shabu nga nitimbang og 55 gramos nga nagkantidad tanan ngadto sa P374mil.

Nasayran nga si Laucrenciana nasikop na kininiadtong tuig 2016 gumikan sa pagpamaligya og ginadiling drugas.

Nakagawas kini gikan sa prisohan niadtong tuig 2019 apan nabantayan nga padayon gihapon kini sa ilegal nga kalihokan.

Samtang Lungsod sa Consolacion, nikabat ngadto sa P50,000 ang kantidad sa  shabu nga naasakmit gikan sa suspetsadong pusher diha sa Barangay Lanipga sa nahisgutang lungsod.

Si Police Major Jude Cebrero sa Consolacion Police Station niila sa suspetsado nga mao si Jerwin Mendaros, hingkod ang panuigon, nagpuyo sa maong dapit.

Si Mendaros kinsa natingkagol karon sa detention cell sa Consolacion Police Station ang gikatakdang pasakaan og kasong kalapasan sa Republic Act 9165 kun “Comprehensive Dangerous Drug Act of 2002”. Gabriel C. Bonjoc, Romeo.T.  Limpangog/BDB (BANATNEWS)