Yaya nga nidagit sa masuso nadakpan

CEBU, Philippines — Katabang nga gipasanginlang midagit sa upat ka buwang puya nga gipabantayan kaniya nadakpan sa kapolisan sa Barangay Obong, Lungsod sa Dalaguete niadtong Huwebes sa gabii.

Ang nasikop pinaagi sa hot pursuit operation naila nga si Adelyn Letegio, residente sa Sitio Lao-ang, Barangay Valencia, Alegria.

Si Letegio, nasikop human gikatahong midagit sa bata niadtong Mayo 17, 2022 sa gabii gikan sa balay sa iyang agalon sa Barangay Madridejos sa Alegria.

Sumala pa ni Police Major Gilfred Gempisao, Hepe sa Dalaguete Police Station, aduna silay gihimong hiniusa nga hot pursuit operation uban  sa Alegria Police Station sa dihang nakadawat sila og impormasyon nga naa gidala sa suspek ang bata sa maong barangay.

Ang ginikanan sa bata positibo nga miila sa yaya ug sa anak niini nga gikidnap.

Dugang pa ni Gempisao, ang bata nauli na sa iyang mga ginikanan, samtang si Letegio ug uyab niining si Monico Plando naa karon sa kustodiya sa kapulisan sa Alegria Police Station.

Gisusi pa karon kung aduna bay kalabutan ang lalaki sa pagkidnap sa bata. Ang inahan sa bata pinaagi sa iyang social media post mapasalamaton sa tanan nag post ug share sa pagpangita niya sa bata kay nabalik na gyud kini sa iyaha.

Mapasalamaton usab siya sa kapulisan sa Alegria Police Station ug sa Dalaguete sa walay hunong nga pagpangita sa iyang anak. — /IBM (BANAT NEWS)

Show comments