CEBU, Philippines — Tinguha karon sa Probinsya sa Sugbo nga masugdan na karong tuiga ang circumferential road sa Malapascua island sa Daanbantayan aron mas mapadali ang transportasyon sa mga tawo didto.
Matud ni Cebu Governor Gwendolyn Garcia nga karong nitugot na ang mga land owners nga modonar sa ilang property nga maigo sa dalan, makapadayon na ang kapitolyo sa plano niini nga circumferential road sa isla nga usa sa mga sikat nga tourist destination sa probinsya sa Sugbo.
“It took quite some time because we needed to get the road right of way, but finally we will be starting on the Malapascua Island Circumferential road kay kon mosakay ka didto og habal2, kapila na ko ana usahay maghiyak hiyak imong tiyan. Naglisod man gud ta og kuha og road right of way,” matud ni Garcia. Si Limuel Daño ang kapitan sa Malapascua nagkanayon nga nipirma na ang dili momenus 20 ka homeowners didto sa isla sa mga dokumento nga kinahanglan aron mapadayon ang proyekto.
Si Daño nagkanayon nga apil siya sa mga land owners nga nidonar sa iyang bahin sa property alang sa proyekto.
Sa pagkakaron wala pa masayri pila gyud ang kantidad tanan sa magasto sa maong proyekto.
Si Daanbantayan Mayor Sun Shimura nanghinaot nga madayon na ang maong proyekto karong tuiga hilabina nga usa kini sa nakita nila nga pamaagi aron nga mas molambo pa ang turismo sa Malapascua.
“Makatuyok ta stibook isla by foot nga dili na hago ug hasol. The plan of governor is really for tourism gyud,” matud ni Shimura.
Sa panahon ni kanhi gobernador ug bise gobernador Hilario Davide III aduna sab plano pagsemento sa lima ka kilometro nga dalan sa Barangay Loon o Malapascua island sa Daanbantayan apan wala kini mapadayon. — /IBM (BANAT NEWS)