Radaza, mga Martinez gikonbikto

CEBU, Philippines — Nalakip si Kongresista Paz Radaza sa Dakbayan sa Lapu-Lapu nga gikonbikto sa Sandiganbayan tungod sa matud pa kahiwian sa paggasto sa P24.2 milyones nga pork barrel ni kanhi kongresista Clavel Asas-Martinez sa ikaupat nga distrito sa lalawigan sa Sugbo.

Ang Sandiganbayan nikombikto nilang Martinez, mga anak niini nga sila si kanhi mayor ug karon Bokal Celestino “Tining” Martinez III ug Bise Mayor Maria Cielo “Mayel” Martinez sa Dakbayan sa Bogo, kanhi konsehal Rhett Minguez ug Cresencio Verdida ug mga opisyal sa Girl Scout of the Philippines-Cebu Council nga sila si Rhodariza Kilantang ug Julieta Quiño.

Si Radaza maoy tresurera sa GSP-Cebu Council niadtong 2000 hangtud 2003 ug gipulihan siya ni Mayel dihang nahimo siyang council president sa 2003 hangtud 2006. Si Kilantang ang bookkeeper sa GSP Cebu sa 2000 hangtud 2003 samtang si Quiño ang cashier-designate sa maong tuig.

Ang mga akusado konbiktado sa tulo ka ihap sa kasong graft ug laing tulo ka ihap sa malversation of public funds ug gihukmang mabilanggo gikan sa 18 ngadto sa 30 ka tuig sa kasong graft ug dili na makakupot og pwesto sa gobyerno ug mawala na ang ilang retirement benefits samtang laing 24 ngadto sa 51 ka tuig nga pagkabilanggo sa kasong malversation.

Si Mayel gikonbikto sa usa lang ka kasong graft ug usa ka malversation samtang si Radaza gikonbikto sa duha ka kasong graft ug duha ka malversation.

Si Clavel, Tining, Minguez, Verdida, Kilantang, Quiño ug Mayel pabayron og P10 milyones nga multa matag usa sa kasong malversation samtang gawas kang Mayel, ang ubang akusado pabayron sab og laing P14.4 milyones nga multa sa tagduha ka kasong malversation ug ila sab iuli ang laing P14.4 milyones nga ilang nagasto nga pundo sa gobiyerno ngadto sa Bureau of Treasury.

Niadtong 2002, ang mga akusado giingong nikawkaw sa P14.4 milyones nga PDAF nga alang unta sa anti-drug campaign sa GSP-Cebu.

Ang pundo unang gideposito sa panudlanan sa kaniadto Lungsod sa Bogo diin si Tining ang mayor samtang si Minguez ang municipal treasurer ug si Verdida ang municipal accountant. Apan ang pundo giingong gibalhin sa personal nga panudlanan ni Clavel ug niadtong 2003 ug P10 milyones niini ang giingong gibulsa sa mga akusado.

Sa samang adlaw niadtong Hunyo 13, 2002 kanus-a gideposito ang pundo sa personal account ni Clavel mao usab ang pag-withdraw niini sa kantidad nga P7.5 milyones ug giingong P400,000 lang gihatag sa kanhi kongresista ngadto sa GSP Cebu Council isip donasyon.

Niadtong Septiyembre 18, 2002, si Clavel giingong nikobra na sab og laing P7.5 milyones ug nihatag na sab og P200,000 ngadto sa GSP Cebu Council isip donasyon.

Si Associate Justice Kevin Narce B. Vivero ang nisuwat sa 86 ka pahina nga desisyon ug giuyonan kini nilang Sandiganbayan Sixth Division Chairperson Sarah Jane T. Fernandez ug Associate Justice Karl B. Miranda.

Usa ka opisyal nga si Alejandrita Meca ang pabilin pa nga wala igkita sukad sa pagsugod sa kaso.

Ang mga akusado pwede pang modangop sa Korte Suprema aron mausab ang hukom sa Sandiganbayan. —IBM (BANATNEWS)