CEBU, Philippines — Giangkon sa Cebu City Police Office (CCPO) nga hagit gihapon kanila ang pagmonitor sa electronic 'sabong' human makadawat og mga taho nga bisan sa suspensiyon daghan gihapon ang nagpusta pinaagi sa cellular phones.
“Mao na siyay usa na nakalisod kay pwede rakang mo- open og website, dira ra ka sa kwarto nimo, so wala nay makakita, wala nay police makabadlong,” matud ni Lt. Colonel Wilbert Parilla, Deputy City Director for Operations sa CCPO.
Giangkon ni Parilla kagahapon (Huwebes), nga bisan pa sa pagsuspenso sa operasyon niini, nakadawat gihapon sila og mga taho sa e-sabong operations sa dakbayan apan pinaagi na sa cellphones.
"So we will ask guidance with it no, kung apil ba ni sya gihapon sa gipahunong, we will seek guidance first sa atong higher headquarters or sa atong legal service kung unsa atong buhaton ani, if illegal kung unsay mga ebidensya ang kuhaon nato," matud ni Parilla.
Tungod niini, si Parilla nag-awhag pag-usab sa publiko sa paghimo sa inisyatiba ug dili nalang manugal sa e-sabong nga karon giisip nga ilegal.
Sa wala pa ang deklarasyon sa e-sabong suspension nabantayan na sa kapolisan nga gisarado dayon ang mga dagkong e-sabong betting centers sa dakbayan.
“So far wala na kaayo tay report sa (illegal) tigbakay considering naa nay mga open nga legal nga cockpit arenas,” matud niya. —IBM (BANATNEWS)