Cebu City Comelec manghatag na sa allowance sunod semana
CEBU, Philippines — Gipahibawo ni Cebu City South District Election Officer Marilou Paredes nga karong Mayo 24, 2022 magsugod na sila sa pagpanghatag sa allowance sa mga magtutudlo nga niserbisyo sa milabay’ng eleksiyon.
Matud ni Paredes nga gumikan sa kadaghang magtutudlo sa north ug south district ang hataganan og allowance ilaha kining gi-schedule aron dili maghuot inig pagpanghatag na.
Lain-lain ang kantidad nga madawat sa mga niserbisyo sa niaging eleksiyon diin ang chairman sa elector board P10,000 ang madawat kuhaan kini og 20 persyento nga tax samtang ang poll clerk ug third member P9,000 ug kuhaan gihapon og 20 porsyento nga tax.
“Among i-by barangays, mag-scheduling mi kay dili lalim kay dako-dako baya ni atong city, among gi-scheduling, ang first namo tagaan is ang electoral board, Department of Education Supervisor Official(DESO) ug and DESO technical support staff”, butyag ni Paredes.
Gibana-bana sa Comelec Cebu City nga sulod sa pito ka adlaw mahuman nila og hatag ang allowances sa kapin 4,000 ka magtutudlo nga niserbisyo sa May 9, 2022 national ug local elections.
Nasayran nga ang Department of Education Cebu City nanghinaot nga unta maaprobahan ang plano nga P3,000 nga umento sa allowances.
Apan matud ni Paredes nga wala pa sila’y nadawat nga kamandoan ug guidelines kalabot niini. —BDB (BANATNEWS)
- Latest