Kaso sa dengue sa Cebu City nisaka

CEBU, Philippines — Gitug-an sa officer-in-charge sa Cebu City Health Department Dr. Jeffrey Ibones nga ang kaso sa dengue karong tuiga nisaka itandi sa nakalabay’ng tuig.

Sa datos sa Cebu City Health Department gikan sa buwan sa Enero hangtud sa Mayo niining tuiga ang Siyudad sa Sugbo nakatala og 422 ka kaso sa dengue taas kini itandi sa samang mga buwan sa nilabay’ng tuig nga anaa lang sa 36 ang kaso sa dengue sa siyudad.

Sa samang period usab karong tuiga 13 ang natala nga namatay samtang sa niaging tuig wala nakaabot og napulo ang gidaghanon matud ni Ibones.  Giingong kasagaran sa mga nakalas sa dengue mga bata diin uban niini grabe na nga gihatud sa tambalanan ug wala na matabang.

Ang CCHD niawhag sa katawhan nga kon gipanghilantan ipasusi dayon kini.  Matud ni Ibones nga daghan sila og rason nga nakita nga hinungdan sa pasaka sa kaso sa dengue siyudad diin usa niini ang mga katalagman sama sa bagyo nga niigo sa Cebu City.

Ubos usab sa datos sa CCHD ang top 10 barangay nga daghan og kaso sa dengue gilangkuban sa Lahug, Guadalupe, Mambaling, Labangon, Quiot, Kamputhaw, Capitol Site, Punta Princesa, Inayawan, Tisa, Kalunasan ug Pardo.

Aron mapugngan ang pagsaka pa sa kaso sa dengue sa siydad gimandoan sa CCHD ang ilahang dengue team nga mohimo og lakang ug nakig-alayon usab sila sa Department of Interior and Local Government (DILG) Cebu City aron matabangan usab sila.

Pipila sa mga programa sa CCHD aron mamenosan ang kaso dengue mao ang search and destroy, orientation sa city health workers ug community ingon man pagtibangay sa tanan ilabi na sa barangay officials ug lumolupyo. —BDB (BANATNEWS)

Show comments