CEBU, Philippines — Nagsugod na og balik pagpamakuna og ikaduhang booster shots ang Cebu City Health Department matud pa ni Dr. Jeffrey Ibones, Officer-in-Charge sa maong buhatan.
Apan giklaro ni Dr. Ibones ang gihatagan lang gyud nila og second dose sa booster shot kadtong mga immunocompromised individuals sama sa Immunodeficiency state, HIV, Active cancer or malignancy, Transplant recipients, Undergoing steroid treatment, Patient with poor prognosis / bedridden patients ug ubang conditions sa immunodeficiency nga sertipikado sa doktor. Matud ni Ibones nga tanang vaccination sites sa siyudad mohatag og second dose sa booster shot apan giangkon niini nga dili pa gyud daghan ang nipahimulos niini nga naa pa lang sa kapin 200 ka tawo sulod sa dul-an usa ka buwan nga paghimo niini.
“I don’t know unsay reason, naay uban dili sad gyud ganahan but ato lang sila gi encourage nga magpabakuna mao na nakig-coordinate pud ta sa oncologist, nakig-coordinate ta sa ubang specialty para atong makunahan,” sigon ni Ibones. Kadtong mga dunay kanse apan dugay na wala nag-inom og tambal ug kadtong mga nagsige pa og paalim sa ilahang gihambin nga balatian importante nga duna sila’y mapakita nga medical certificate sa dili pa magpa second dose sa booster shot. Ang mga mokuha sa second dose sa COVID-19 vaccine booster shot maoy papilion kun unsa nga bakuna ang gusto nila nga iturok sa ilaha. “In fact, nakig-coordinate pud mi sa other hospitals nga kung if ever gani if pwede adto lang sa ilaha like dialysis patient adto lang sa dialysis center pwede didto lang tagaan nato og kuan, pwede ra gyud na siya”, sigon ni Ibones.
Sa pikas bahin, gibutyag sa Emergency Operations Center sa siyu dad nga 11 nalang ka barangay ang dunay kaso sa Covid-19 karon.
Matud pa ni Konsehal Joel Garganera, sa 312 nga gi test dili palang dugay walay nagpositibo sa Covid-19.
Dugang pa ni Garganera, sukad pagsugod sa 4th Omicron Surge, adlaw nga Martes maoy pinakaubos nga active case sa siyudad nga niabot lang sa 22 ug 69 na usab ka barangay walay kaso sa Covid-19. —Rowena Capistrano/IBM (BANATNEWS)