Problema sa baha usa sa mga prayoridad ni Guardo

CEBU, Philippines — Ang pagsulbad sa problema sa baha sa Dakbayan sa Sugbo mao ang usa sa mga nag-unang prayoridad ni Konsehal Jerry Guardo kinsa gihatagan og laing termino sa pagserbisyo sa siyudad.

Niadtong nilabay’ng eleksiyon niabot sa 116,937 ang nakuhang botos ni Guardo sa north district diin ikaduha kini sa labing taas.

Apil usab sa iyahang top priority list ang pagpalapad sa mga gagmay’ng karsada ug pag-abli og dugang mga bag-ong karsada aron maminos ang suliran sa trapiko.

Matud ni Guardo nga base sa record sa City Assessors Office ug Bureau of Lands orihinal kini nga mga public road nga aduna nay mga estraktura.

Sa laing bahin, mohangyo usab si Guardo alang sa dugang gahin nga pundo sa pagpalit og solar lights nga ipang-apod-apod ngadto sa mga barangay ilabi na sa kabukiran.

Nagplano usab si Guardo og proyekto nga patubig.

“I will author for water distribution, bulk water supply from GE Hydro and MCWD”, padayag ni Guardo.

Si Guardo nagkanayon nga padayon siyang makig-alayon sa Department of Public Works and Highways (DPWH) alang sa pagkonkreto sa mga proyekto.

Magpadayon usab ang iyang mga programa sama sa dredging, de-clogging, ug pagpanglimpiyo sa mga kanal sa dakbayan.

Giumol ni Guardo ang River Trooper Group alang sa pagpanglimpiyo sa mga sapa sa dakbayan,.

Sa pagkakaron, siya ang chairman sa committee on infrastructure sa Sangguniang Panlungsod ug nanghinaot siya nga mahuptan gihapon ang maong komitiba  sa higayon nga mosulod na ang 16th Sangguniang Panlungsod. BDB (BANATNEWS)