Mga kandidato gimandoan pagduso sa ilang SOCE

CEBU, Philippines — Hatagan og hangtod Hunyo 8 karong tuiga ang tanang mga kandidato nga makasumiter sa ilang Statement of Contribution and Expenditures (SOCE) o pila ang ilang nadawat nga pundo ug nagastos sa panahon sa kampanya sa bag-ohay lang natapos nga piniliay niadtong Mayo 9. Matod ni Atty. Jerome Brillantes, ang acting provincial election supervisor sa Sugbo nga hatagan og 30 ka adlaw gikan sa adlaw sa piniliay ang tanang mga kandidato apil na ang mga partylist nga makasumiter sa ilang SOCE. 

Ubos sa section 14 sa Republic Act 7166 ang matag kandidato o political party kinahanglan mosumiter og tibuok, tinuod ug itemized nga “statement of all contribution and expenditures” kalabot sa election.  Ang pag file sa SOCE pamaagi sa Comelec pagsusi kun pila ang nagasto sa mga kandidato sa ilang pangampanya kun nisobra ba kini o nag overspend sa giset sa Comelec nga kantidad sa angay ra nga gastuohon sa kanidato.  Ang mga pakyas nga makasumiter sa ilang SOCE posibleng mag atubang og kasong administratiba kon diin makabayad kini og P1, 000 ngadto sa P30,000 sa mga first offender.  “For the commission of a second or subsequent offense under this section, the administrative fine shall be from Two thousand pesos (P2,000.00) to Sixty thousand pesos (P60,000.00), in the discretion of the Commission. In addition, the offender shall be subject to perpetual disqualification to hold public office,” Pagbasa sa RA 7166.

Si Brillantes nagkanayon mas sayo sayo makasumiter ang kandidato mas maayo. —IBM (BANATNEWS)