LTO sa Bohol ug Negros Oriental buksan na og balik

CEBU, Philippines — Gipahibawo ni Land Transportation Office (LTO)-7 Regional Director Victor Emmanuel Caindec nga si LTO Chief Assistant Secretary Edgar Galvante miaprubar sa iyahang request  nga ablihan og balik sa full-service licensing centers sa Probinsiya sa Bohol ug Negros Oriental.

Matud pa ni Caindec nga tumong sa maong kalambuan nga makatabang sa pag-decongest sa LTO Licensing Center offices sa maong mga Probinsiya.

Dugang sa Regional Director nga ang maong mga buhatan sirado kaniadto gumikan kay menus ang kliyente gumikan sab sa limitadong mga serbisyo nga gitanyag.

"As a full-service licensing office, it can now cater to all licensing-related transactions and it is inside the malls which is convenient to our clients", suma ni Caindec.

Sa tubag ni Asec. Galvante niadtong Abril 11, kini mitugot sa hangyo ni Caindec diin mimando kini nga himoon ang gikinahanglan nga pagpangandam sa pag-facilitate sa dinalian nga pag abli og balik sa maong mga buhatan.

Niadtong September 2020 ang duha ka buhatan sirado kay naapektuhan sab kini sa lockdown tungod sa pandemya.

Kini midugang nga dihang miasumer siya sa regional office niadtong January 2018, usa lang ang buhatan sa Bohol nga nag-atiman sa tanang bag-ong licensing transactions sa tibuok Probinsiya.

Ang LTO office sa Bohol naglakip sa Jagna District Office - Garcia Hernandez sa West Canayaon, Garcia-Hernandez; Tagbilaran City District Office sa R. Enerio St. Dampas Road, Tagbilaran City; Talibon Extension Office sa Poblacion, Talibon; ug Tagbilaran DO Licensing Ext. (Alturas Mall) sa Poblacion II, Tagbilaran City.  Ang Bohol Licensing Center gi-target nga buksan sa ikaduha o sa ikatulong semana ning buwana. —MEL (BANATNEWS)