BFP mo-deploy og mga tawo sa polling centers

CEBU, Philippines — Gipahibawo sa tigpamaba sa Cebu City Fire Office Senior Fire Officer 2 Wendel Villanueva nga usa sila sa gitahasan sa paghatag og seguridad sa umaabot nga May 9, 2022 National ug Local Elections.

Sigon ni Villanueva nga karong adlawa sugdan na nila og deploy ang ilahang mga firetrucks diin mag-roving sila sa matag tunghaan matag duha ka oras hantod na kini sa adlaw na gyud sa piniliay.

Sa adlaw’ng Lunes ang mga firetrucks sa Cebu City Fire Office mag-roving sa mga polling centers nga nasakop sa ilahang area of responsibility matag oras.

Matud sab ni Villanueva nga duna sila’y gi-establisar nga incident command post diha sa Pahina Fire Sub-Station ingon man sa Cebu City Hall.

Nasayran ang Cebu City Fire Office dunay 145 ka personnel nga i-deploy sa umaabot nga piniliay ug laing 20 ka personnela ng i-assign sa Regional Election Monitoring Action Center (REMAC) diha sa Police Regional Office-7.

Gibutyag ni SFO2 Villanueva nga nakapahigayon na sab sila og fire safety inspections sa mga polling centers diin giseguro nila nga dunay minimum compliance sa fire safety ug dunay fire safety equipment.

Gi-mobilize sab sa Cebu City Fire Office ang tanang sakop sa Barangay Volunteer Brigades diin gipa-station sila sa tagsa-tagsa nila ka lugar aron abagan ang CCFO.

Hangyo sa Cebu City Fire Office sa katawhan nga kun mahimo dili magdungan og botar apan kun dili gyud kalikayan seguraduhon lang nga ang mga dekuryente nga mga appliances pang-ibton sa mga saksakan o kaha pagngon ang circuit breaker aron masiguro nga malikayan ang sunog.

Samtang ang Mandaue City Police Office mopakatap og 523 ka mga polis sa polling precincts sumala pa ni Police Lieutenant Franc Rufolf Oriol, MCPO deputy director for operations.

Si Oriol miingon nga upat ka mga polis ang gidistino sa matag polling center nga adunay duha ka shifting schedules.

Gawas sa kapolisan, lakip ang Armed Forces of the Philippines ug Philippine Coastguard moabag sab sa pagbantay.— Romeo T. Limpangog (BANAT NEWS)