Anak ni Yayoy niduso na sa iyang COC
CEBU, Philippines — Opisyal na nga niduso kagahapon sa iyang certificate of candidacy alang sa pagka-konsehal sa south district sa Dakbayan sa Sugbo ang anak ni kanhi konsehal Raul “Yayoy” Alcoseba nga si Ramonito Alcoseba.
Gikuyogan si Alcoseba diha sa buhatan sa Commission on Elections sa kandidato pagka-mayor ubos sa Bando Osmeña Pundok Kauswagan (BOPK) nga si kanhi konsehal Margarita “Margot” Osmeña.
Si Ramonito maoy nihulip kangYayoy kinsa nipanaw na ngadto sa laing kalibutan sa edad nga 71-anyos niadtong Abril 23, 2022.
Nasayran nga taud-taod na nga nag-uban-uban si Ramonito sa nagkadaiyang kampaniya o kalihokan sa BOPK.
Ug siya ang kanunay nga kauban sa iyang amahan kon maghisgot og politika ug sports.
“Ako mapasalamaton sa tanang giya og suporta nga inyong gihatag. Ipadayon nato ang nasugdan”, matud ni Ramonito.
Taud-taod na nga naprinta ang balota hinungdan nga magpabilin gihapon ang pangalan sa iyang amahan.
Ang tanang botos nga makuha ni Yayoy adto na kini mapunta kang Ramonito.
Base sa lagda sa Comelec kinahanglan nga susama og apelyido ang mopuli sa nipanaw nga kandidato.
Nahimo si Yayoy nga konsehal sa Siyudad sa Sugbo niadtong tuig 2004 ug usa sa mga karaan nga miyembro sa BOPK nga gipangulohan ni kanhi mayor Tomas Osmeña.
Nahimo siya nga miyembro sa 10th, 11th, ug 12th Sangguniang Panlungsod sa Siyudad sa Sugbo ug nahimo usab siya nga board member sa first district sa Probinsiya sa Sugbo gikan niadtong tuig 2013 hangtud sa 2016.
Subli siya nga napili isip Cebu City councilor niadtong tuig 2019 isip sakop sa 15th Sangguniang Panlungsod ug nakaumol siya og 34 ka ordinansa. BDB (BANATNEWS)
- Latest