Negosyante gipatay sa sakop

CEBU, Philippines — Patay ang usa ka negusyante human siya gidunggab sa iyang trabahante diha sa Barangay Dumlog, Dakbayan sa Talisay kagahapon sa buntag.

Ang biktima mao si Nomiriano Lastimosa Jr. alyas Boss Jing, 54, nagpuyo sa nahisgutang lugar.

Samtang ang suspek mao si Geeiven Urbano alyas Iben, 37, taga Barangay Talamban, Syudad sa Sugbo.

Si Kagawad Odong Manto sa barangay Dumlog nagkanayon nga nahagba na ang biktima sa iyang pagabot sa nahitaboan ug nagtaup pa ang pinote nga gibana-bana 24 pulgada ang gitas-on sa liog sa biktima ug duna pa kini daghang samad sa iyang tiyan.

Matud ni Manto ang biktima nagabang og yuta ug namuhi og mga baboy ug mga isdang Koi ug guppy dili layo sa iyang gipuy-an. Ang suspek mao ang iyang caretaker.

Maayong tawo ang paghulagway ni Manto kang Lastimosa.

Si Cerila Benuya, nagtrabaho sa himoanan og hollowblocks tapad sa baboyan sa biktima nihulagway nga kalit lang nga nagginukdanay ang duha.

Matud pa ni Benuya nga wala na siya makakita sa pagdunggab apan nagsige siya og siyagit nga husto na.

Dugang pa ni Benuya nga nagkabikil ang duha kay gusto sa biktima nga pabayron ang suspek sa mga nangamatay nga isda.

Human sa hitabo, misakay og e-bike ang suspek ug nitahan sa iyang kaugalingon sa Talisay City Police Station.

Ang suspek namahayag nga napuno na siya sa gihimo sa iyang amo.

Giangkon niya nga namatyan sila og 200 ka isda nga guppy  ug siya maoy gipasanginlan sa biktima ug pabayran kini kaniya og P12 mil.

“Ako man iyang gipasanginlan nga ang pasong pwerte mang inita. Sukad ato wala nako tarong kaon unya wala nako sweldohi sukad pag Oktubre,” matud pa ni Urbano.

Kagahapon, natulog si Urbano sa payag nga iyang pahuwayanan apan nakamata human wala na moandar ang electric fan.

“Nakamata ko sir kay init man kaayo. Paglili nako akoa mang amo akong nakit-an. Ako gitan-aw ang akong pinote hangtud nga mura nakog nayawaan,” saysay pa ni Urbano.

Matud pa niya nabuhat niya kini tungod sa kalagot ngadto sa biktima.

“Wala na koy mahimo sir kay nahitabo naman pero sa ako lang nahuwasan gyud ko sa kalagot kung giunsa ko sa akong amo. Kung putbolon ko giputbol ra unta ko dili kay mag antos ko,” dugang pa ni Urbano kinsa tulo ka tuig na nga nagtrabaho sa biktima.— IBM (BANATNEWS)