P82.5 m shabu sud sa usa ka adlaw

CEBU, Philippines — Mokabat sa P82.5 milyones nga balor sa  gituohang shabu ang nasakmit sa kapolisan sa tulo ka operasyon nga gilusad sugod kagahapon sa kaadlawon hangtud hapon, adlaw nga Sabado sa Dakbayan sa Sugbo.

Kagahapon sa hapon nadakpan sa mga sakop sa Regional Police Drug Unit sa Police Regional Office sa Sitio Tipolo, Brgy. Guadalupe ang 24 anyos nga nakuhaan og napulo ka kilong gituohang shabu.

Ang dinakpan giila nga si Josh Vincent Bacalan Camion,kinsa nakuhaan og mga pinutos nga gituohang shabu.

Si Camion gikatahong nagtrabaho kaniadto isip food delivery apan tungod nihinay ang kita nisulod kini sa maong negosyo sugod sa miaging tuig.

Matud pa nga walo ka buwan nang gipanid-an sa kapolisan si Camion human sila nakadawat og impormasyon nga namaligya kini og drugas.

Ang suspek gipalitan sa poseur buyer og usa ka kilong shabu apan atol sa pagdakop kaniya nakita ang mas daghan pang shabu gikan sa iyang sakyanan.

Sa pikas bahin, sa operasyon sab nga gilusad diha sa Sitio Bliss Barangay Labangon, nadakpan sila si Wilmar Enriquez  Dingding 32, Noel Digor Gilig,30, ug Charles Tudtud Leyson,24, nga nakuhaan og 110 gramos nga shabu nga mobalor og P714,000.  Samtang ang Station Drug Enforcement Unit sa Mambaling Police pinangulohan ni Police Major Dindo Alaras nakasakmit sab og kapin usa ka kilong shabu sa Carlock, Barangay Diuljo Fatima.

Ang dinakpan giila nga si Vincent Laniel Arnaiz Violanda alyas “Ikot” 30. Matud pa ang nakuha kaniya mobalor og  dul-an P7 milyones.

Matud pa ni Violanda nga igo lang siya tighatud sa maong drugas og suholan siya og P10 mil matag hatud niini.

Sa gipahigayon nga followup operation nadakpan usab ang kauban ni Violanda nga si Lyle Gonzales Padilla,34, nga nakuhaan usab og kapin usa ka kilong shabu nga mobalor kapin sa P6.8 milyones. Matud pa ni Alaras nga konektado ang duha.

Si Police Colonel Ernesto Tagle City Director  sa Cebu City Police Office misusi usab sa malampusong operation sa Mambaling Police.

Ang mga dinakpan pasakaan og kasong kalapasan sa Republic Act 9165 o Dangerous Drugs Act.— IBM (BANATNEWS)