Discount cards sa gasolina gipanghatag na sa siyudad

CEBU, Philippines — Kapin sa 200 ka discount card sa ‘Gasolina Mo, Sagot ko Program’ sa Cebu City Government ang gipanghatag na.

Gibutyag kini sa Executive Director sa Sugbo Bike Lanes Board Bernard Maraasin ug suma pa niya nga niadtong miaging semana gisugdan nila ang pagpanghatag sa discount card diin kada Biyernes ang ilang skedyul. Ang Kagamhanan sa siyudad sa Sugbo niumol sa maong programa aron makatabang sa mga motorista nunot sa pagsige og saka sa presyo sa produktong petrolyo.

Suma pa ni Maraasin karong Biyernes laing dul-an 4 mil ka discount card ang ilahang i-panghatag.

“Actually giuna nato ang mga Cebu City residents kay naa may uban ni apply ilabi natong sa online nakita namo nga dili taga Cebu so amo sa gi set aside eventually kung mahuman na to taga Cebu City amo sad ihatag sa ilaha”, matud ni Maraasin.

Nasayran nga ang Cebu City Government nag-andam og 150,000 ka discount cards ug sa pagkutlo ning balita naa na sa kapin 4,000 ang nagpa-register.

Sagad sa mikuha og discount card kining mga habal-habal drivers, hinoon giklaro ni Maraasin nga wala sila’y gi-prioritize kung kinsa to ang unang makahatag og application hatagan dayon nila.  Ang Cebu City Government nakig-alayon sa First Energy Corporation nga franchisee sa Phoenix Gasoline Stations alang sa programa.

Samtang sa laing bahin hatagan og ayuda sa Department of Trade and Industry DTI Cebu Province ang mga gagmay nga magpapatigayon.

Kini pinaagi sa Serbisyo Negosyo sa Barangay alang sa Micro, Small and Medium Enterprise. Gikinahanglan lang nga adunay Certification gikan sa DTI ug existing na ang negosyo.

Matud pa ni Geraldine Abapo, Negosyo Counselor DTI-Province, dili lang kutob sa cash grant apan aduna usab silay monitoring aron mag giya sa mga gagmayng negosyante nga molambo ang patigayon. —Rowena D. Capistrano/MEL (BANATNEWS)