Tito Sen giendorsar sa BOPK

CEBU, Philippines — Opisyal nga giendorsar sa Bando Osmeña Pundok Kauswagan (BOPK) ang kandidatura pagka-bise presidente sa lumad nga Sugbuanong si Senate President Vicente “Tito” Sotto III.

Si Sotto kansang kaliwatan nagagikan dinhi sa Sugbu dako og pasalamat sa pagendorsar ug pagsalig kaniya sa BOPK nga usa ka dakong partido politikal dinhi sa dakbayan.

“We all know Cebu is one of the vote rich province”, sigon ni Sotto.

Ang kalihukan sa BOPK gibituonan sab sa ubang artista sa sikat nga noontime show nga Eat Bulaga nga naghatag og lingaw sa mga dumadapig sa senador ug sa BOPK.

Naa sab sa maong kalihukan si kanhi Comelec Commissioner Rowena Guanzon nga konektado sa P3PWD o Komunidad ng Pamilya, Pasyente at Persons With Disabilities party-list alang sa 2022 national ug local elections.

Wala kapugong si Guanzon pagsaway sa gipatumang polisiya sa kapolisan nga nagdili sa height nga 4 ft paubos  nga makasulod sa kalihukan sa BOPK. Matud pa niya usa kini ka matang sa diskriminasyon sa mga tawong wala magrasyahi og height.

Wala sab palabya ni Guanzon ang pagsaway kang Presidential Candidate Ferdinand “Bongbong” Marcos nga gitawag niya og “kawatan” ug “adik.”

Si Guanzon mipasangil kaniadto nga gituyo paglangay-langay pagpagawas ang resolusyon sa Comelec bahin sa disqualification case ni Marcos kay gipaabot nga paretiruhon una siya.

Gihangyo sab ni Guanzon ang mga Sugbuanon nga supportahan si presidential candidate Vice President Leni Robredo.

Si Guanzon gidugok dayon sa mga tawo pagkaila kun kinsa siya, ang uban nagpahulagway kaniya.

Ang grupo ni Sotto giimbitar sa rally sa BOPK aron makapadayag kini kun unsa ang mga repormang buot niyang buhaton sa panggobiyerno kun siya palarong makadaog.

 “I have come again to this beloved city to meet my fellow Cebuanos. I traced my roots here. My lola used to sell fish at the Carbon Public Market and my lolo used to be a kargador in the pier area. We have relatives who are still living here in Cebu City,” matud pang Sotto.

Ang apohan ni Sotto kon diin gikuha iyang pangalan mao si  Vicente Yap Sotto, kinsa nahimong senador gikan 1946 hangtud 1950 ug nahimong miyembro sa House of Representatives gikan 1922 hangtud 1925 isip representante sa Cebu 2nd district.

Siya maoy nagsuwat sa Republic Act No. 53, o ang Press Freedom Law o mas naila sa tawag nga Sotto Law.

Gawas sa pagka playwright, director, ug producer, si Sotto mao ang gibansagang Father of Cebuano language and letters, ug mipublikar sa labing unang Cebuano newspaper, Ang Suga niadtong tuig 1900.

Ang Republic Act No. 114581 mao ang nagpalig-on sa Sotto Law nga gipirmahan ni Presidente Rodrigo Duterte.

Kining balaora naghatag og katungod sa mga sakop sa media nga protektahan kun kinsa ang ilang tinubdan sa impormasyon.

Si Tito Sen o Senate President Sotto mao sab ang ikaduhang Sugbuanon nga natudlong Senate President, unang nakabaton niini nga posisyon si Marcelo Fernan kinsa maoy lider sa 24-member Senate niadtong Hulyo 27, 1998 hangtud Hunyo 28, 1999, sunod ni Neptali Gonzales nga gipulihan ni Blas Ople.

 “I bring the pride and honor of the Cebuanos in carrying the baton of Senate leadership with a stellar accomplishments. During the 18th Congress, I have been hailed as having a 100 percent attendance in the Senate. The Cebuano brand of public service, like that of the late Senate President Marcelo Fernan, should reverberate in all levels of governance,” matud pang Sotto.

Agi og pagsuporta sa mga Sugbuanon, gihimong usa sa mga prayoridad sa pundo sa gobiyerno ni Sotto ang Vicente Sotto Memorial Medical Center aron masigurong makaangkon og de kalidad nga health care services ang mga Sugbuanon gikan niining maong tambalanan.

Si Sotto sab maoy usa sa mga nangusog aron maimplimentar ang partnership tali sa Cebu Normal University ug VSMMC aron mo offer og College of Medicine isip pamaagi nga makaangkon og usa ka doktor ang matag barangay ilabi na sa mga hilit nga dapit subay sa gimando sa Implementing Rules and Regulations (IRR) of the Universal Health Care (UHC) Act.

Karong buntag, dunay Zumba event nga pangunahan sa kapikas ni Sotto nga si Helen Gamboa-Sotto uban sa mga bituon sa Eat Bulaga diha sa Cebu City Sports Complex. –Decemay P. Padilla