BOPK ug Barug PDP-Laban niarangkada na sa kampanya

CEBU, Philippines — Subay niining nagkaduol nga Mayo 9, 2022 National ug Local Elections ang mga local candidates nag-iyahay na sa pagpahigayon og mga kalihukan kini sama sa grand rallies.

Dinhi sa Cebu City ang Barug PDP-Laban nga gipangulohan ni Cebu City Mayor Michael Rama nga magpapili sab sa pagka-Mayor sa siyudad ug ang Bando Osmeña Pundok Kauswagan (BOPK) pinangulohan sa ilahang mayoralty candidate kanhi konsehal Margarita Osmeña nagpahigayon og grand rally.

Ang grand rally sa Barug PDP-Laban uban sa kaalyado nila nga MARINO Partylist gipahigayon sa nagkalain-laing nga lugar sa South ug North District sa Cebu City. 

Gipasabot ni Rama nga mao na gyud ni ang naandan sa ilahang grupo nga lain-laing lugar ang paghimo sa rally  aron   dili na molakaw pa og layo ang mga tawo ug daghan ang makakita.

Dugang ni Rama tungod kay naa naman sa campaign period lauman na gyud ang mga kahuot sa dagan sa trapiko.

Sa pikas bahin, ang proclamation rally sa Bando Osmeña Pundok Kauswagan (BOPK) sa Cebu City Sports Center gipahigayon kagahapon.

Gisugdan kini sa Santos nga Misa diin si Father Erik Orio gipahinumduman ang katawhan nga mobotar base sa ilahang konsensiya.

Ang kalihukan sa BOPK gipangulohan ni mayoralty candidate Margarita Osmeña ug vice mayoralty Candidate Franklyn Ong.

Ang ilang mga Konsehal sa South District mao sila si Gremar Barete, Jose Abellanosa, Roberto “Bob” Cabarrubias, Bea Osmeña, Pie Abella, Raul Alcoseba ug kanhi Judge Jack Jaca.

Sa North District mao sila si Joy Augustus Young, Alvin Dizon, Nestor Archival, Lea Japson, Sisinio Andales, Alvin Arcilla, Mary Ann delos Santos ug Arturo Barrit.

Ilahang Kongresista sa South District mao si BG Abellanosa ug sa North District mao si Cutie del Mar.— IBM (BANATNEWS)