CCPO ubos sa full alert status alang sa Semana Santa ug eleksiyon

CEBU, Philippines — Sugod kagahapon ubos sa full alert status ang kapolisan ug gilaomang hangtud na kini panahon sa election.

Kini ang gibutyag ni Police Lieutenant Colonel Wilbert Parilla, deputy director for operations sa Cebu City Police Office (CCPO).

Matud ni Parilla nga karon palang nagpadayon na ilang mga tigom tali sa mga kadagkoan sa Archdiocese of Cebu alang sa mga pagpangandam sa kalihokan sa Semana Santa ilabi na mobalik na ang mga naandan nga kalihokan.

Ug karon nga ubos na sa alert level 1 ang siyudad mobalik na ang Visita Iglesias, procession ug uban pa hinungdan nga sa sunod semana ma-final na ang kalihokan sa Archdiocese ug kapolisan.

Si Parilla nagkanayon nga gilaoman usab ang presensiya sa kapolisan ilabi na sa mga lugar nga dagsaan sa mga tawo ug ilaha usab nga gipangandaman ang paghugop sa katawhan ilabi na duha katuig wala mahimo ang mga kalihokan tungod sa COVID-19 pandemic.

Matud usab ni Parilla nga wala nay mga polis sa Cebu City nga gitugotan nga mo leave ug mo absent karong panahona tungod kay sa higayon nga kinahanglanon sila anaa dayon.

Dugang ni Parilla nga sila sa CCPO dili na kuhaan ug dili na usab dugangan og personnel gikan karon hangtud sa panahon sa eleksiyon hinungdan nga i-maximize na lang nila ang ilang mga tawo. (BANAT NEWS)