Kaso sa COVID-19 sa Cebu City padayong nikunhod — EOC
CEBU , Philippines — Padayon nga mikunhod nag kaso sa COVID-19 sa Siyudad sa Sugbo tungod kay base sa datos nga gipagawas sa Emergency Operations Center naa nalang sa 69 ang active COVID-19 cases sa siyudad.
Ang daily positivity rate sa siyudad karon naa lang sa 1.09 percent pasok kini sa 5 percent WHO threshold. Sa 80 ka barangay sa siyudad 45 niini wala nay natalang natakdan.
Una ng gihulagway ni Konsehal Joel Garganera, pangulo sa Emergency Operations Center Cebu City nga dako og natabang ang bakuna sa kalamboan.
Gani sa data nga gihatag ni Dr. Jeffrey Ibones, Officer-in-Charge sa Cebu City Health Department niabot na sa 1,125, 482 ang total registered adults samtang sa mga bata nga 12 to 17 years old niabot na sa 92,705 ang na-register ug 22,633 ka mga bata nga nag-edad og 5 anyos ngadto sa 11 anyos ang register aron magpabakuna ug nabakunahan na.
Sa pikas bahin, karong gipaubos na ang Lapu-Lapu City sa Inter Agency Task Force sa alert level 1 classification, gipahibalo sa Lapu-Lapu City Police Office (LCPO) nga magpadayon ang ilang higpit nga pagbantay di lang sa batok sa mga krimen kondili hasta sa pagpasunod sa health protocols.
Ang maong siyudad ubos na karon sa alert level 1 sugod Abril 1 hangtud sa Abril 15.
Si Police Colonel Arnel Banzon,director sa Lapu-Lapu City Police Office (LCPO) miingon nga nunot sa pagluag na sa restriksyon adunay posibilidad nga mosaka usab krimen sama sa kawat, tulis ug uban pa.— Romeo. T Limpangog (BANAT NEWS)
- Latest
