Pabrika sa bihon naugdaw, P28 milyones ang danyos

CEBU, Philippines — Niulbo ang sunog sa usa ka pabrika sa bihon sa barangay Cansojong, Dakbayan sa Talisay kagahapon sa alas 3:04 sa kaadlawon.

Ang tag-iya sa maong factory sa bihon mao si Fredrich Ngosiok.

Si FO1 Reenson Fer sa Talisay City Fire nagkanayon nga niabot sa ilang buhatan ang gwardya sa factory aron sa pagpahibawo kanila sa nahitabo nga sunog.

Matud pa paspas ang pagkatap sa kalayo diha sa production ug storage room sa himoanan og pansit canton.

Di momenos 10 ka mga sakyanan sa kabumberohan ang miresponde gumikan kay lisod ang pagpawong sa kalayo ilabi na nga may sagol nga mantika ang pasilidad nga nasunog.

Matud pa ni Fer nga giisa nila sa 3rd alarm ang estado sa sunog hangtud nga na fire out kini mga alas 5:59 sa buntag.

Usa ka chinese fire volunteer nga si Russel Gocuan, 31 anyos ang nakaangkon og first degree burn human siya na slide ug napaso sa tubig nga may sagol nga init nga mantika.

Napawong ang kayo pinaagi sa pagsagol og kemikal sa tubig nga gipasirit diin nahimo kini og foam.

Gibana-bana nga moabot sa P28 milyones ka pesos ang danyos sa maong sunog nga padayon pa karong gisusi kun asa nagsugod.

Sa laing bahin, nagbilin og  P450 mil nga danyos ang sunog nga niulbo sa may Gonzales Compound, Barangay Kamputhaw ning Dakbayan sa Sugbo kagahapon sa buntag.

Ang sunog naglambigit og  balay nga giingong gipanag-iya ni Gerardo Evangelista ug gipuy-an ni Mark Ybañez.

Si Fire Officer 3 Emerson Arceo, Fire Investigator wala pa makahatag og dugang impormasyon bahin sa maong sunog.— Rowena D. Capistrano/IBM (BANATNEWS)