Second dose sa mga batang magpabakuna dili na teksan

CEBU, Philippines — Nagpahinumdom si Dr. Jeffrey Ibones, Officer-in-Charge sa Cebu City Medical Center nga ang Cebu City Government dili na magpadala og text messages sa mga batang nag-edad og 5 anyos ngadto sa 11 anyos lang sa ilahang first dose.

Nasayran nga niadtong miaging adlaw pa gasugod ang kagamhanan sa siyudad paghatag og second dose sa maong mga edara.

Matud ni Ibones nga tan-awon lang sa mga ginikanan ang vaccination cards kay makita didto ang schedule alang sa second dose sa ilang mga anak ayha pa sila moadto sa mga vaccination site.

Ang mga vaccination sites alang sa 5 anyos ngadto sa 11 anyos naa diha sa Robinson’s Cybergate, Ayala Center Cebu ug gym sa Cebu City Sports Center.

“Tan-awa lang ang inyohang schedule for the second dose unya duol lang mo sa bisan asa nga vaccination site nga naay example naay 5 to 11 pwede ra mo kung taga Abellana mo dawaton ramo namo kung moadto mo og Ayala or cybergate mag-second dose or vice versa. Basta tan-awa lang ang inyohang schedule ang uban gahuwat sa text, ayaw nalang mo og huwat tan-awa nalang ang schedule unya duol lang mo sa inyohang vaccination nga nag-open nianang age group,” matud ni Ibones.

Nasayran nga niabot na sa 6,400 ang nakadawat sa ilahang first dose sa COVID-19 vaccine ug naa sa 590 ang nakakompleto na sa ilahang bakuna.

Base sa datos sa Cebu City Health Department niabot na sa 17,594 ang nagpa-register nga mga bata nga 5 to 11 years nga gustong magpabakuna kontra COVID-19.

Sa laing bahin, ang GMR Megawide Cebu Airport Corporation nipahigayon ug tulo ka adlaw nga vaccination drive uban sa pakig-alayon sa Department of Health ug Lapu-lapu City Government pinaagi sa ilang Covid-19 Mobile Vaccination gikan sa Marso 9-11, 2022.

Ang tulo ka adlaw nga vaccination drive kasamtangan karon gipahigayon sa may Terminal 1 Departures Grand Lobby sa Mactan Cebu International Airport gikan sa alas otso sa buntag ngadto sa alas singko sa hapon.

Ang kadagkuan sa GMR Megawide, niawhag sa publiko ilabi na kadtong mobiyahe agi sa MCIA nga mo avail sa maong oportunidad ug magpabakuna.

Ang maong vaccination hub, bukas kini ni bisan kinsa nga nagtanyag ug 1st dose, 2nd dose ug booster shots basta niabot na og tulo ka buwan human sa ilang primary vaccine shots.

Abli usab ang maong vaccination site alang sa pediatric nga nag edad 12 ngadto s 17 anyos.

Alang sa interesado ug sa buot magpabakuna kinahanglan magdala ug valid IDs ug karaan nga vaccination card kung magpa booster.— Rowena D. Capistrano/IBM (BANATNEWS)