Karsada sa Mohon posibleng mohuot atol sa kalihokan sa pista

CEBU, Philippines — Magsaulog sa ika-37 ka tuig nga kapistahan ang Santo Niño Parish sa Barangay Mohon, Dakbayan sa Talisay karon ug ugmang adlawa.

Ang kalihokan maglakip sa mobile ug fluvial procession hinungdan nga ang City of Talisay-Traffic Operation Development ang Authority (CT-TODA) nipahimangno na daan sa mga motorista nga planohon ang ilang mga lakaw ilabi na kong diha dapit sa Mohon ang ilang pagbiyahe.

Si Jonathan Tumulak, pangulo sa CT-TODA nagkanayon nga atol sa besperas sa pista himuon ang mobile procession nga sugdan sa ala 1:00 sa hapon ug sundan usab kini sa fluvial procession.

Matud ni Tumulak nga ang karsada sa Mohon, Lawaan 2, Pooc ug Biasong ang malakip sa rota sa mobile procession ug adunay posibilidad nga mabara ang trapiko sa maong mga lugar.

Hinuon sila sa CT-TODA hugot nga mopatuman sa “no parking” sa mga karsada nga maagian sa procession.

Upat ka sakyanan ang gitugotan nga mouban sa mobile procession samtang upat ra usab ka bangka ang gitugotan sa fluvial procession nga magsugod diha sa kadagatan sa Barangay Pooc hangtud sa Larawan Beach sa Barangay Poblacion. BDB (BANATNEWS)