Duha ka senior citizens gidakop tungod sa pangilad

CEBU, Philippines — Gidakop sa kapolisan ang duha ka senior citizens sa kasong pagpangilad nga sila mga opisyal sa kapunongan sa mga senior citizens sa ilang barangay.

Agosto August 25, 2021 gisang-at sa Mandaue City Prosecutor’s Office ngadto sa korte ang kasong falsification of documents batok nilang Gabriel Babon ug Virgilio Aniel Sr. hinungdan na nga nalutsan sila og warrant of arrest nga giluwatan sa Municipal Trial Court in Cities (MTCC) Branch 1 sa maong siyudad.

Ang kaso nagsugod sa reklamong gipasaka ni Avelino Diano, ang pangulo sa Paknaan Senior Citizens Association, Inc. (PSCAI), ug sa 13 pa ka laing mga opisyal batok ni Babon ug Aniel niadtong Hunyo 30, 2021.

Base sa reklamo nga sila si Babon ug Aniel nangayo og accreditation alang sa PSCAI niadtong Agosto 18, 2016 sa Sangguniang Panlungsod sa Dakbayan sa Mandaue diin si Babon nagpaila nga maoy presidente samtang si Aniel ang kalihim.

Nasuta base sa General Information Sheet sa Securities and Exchange Commission (SEC) niadtong Mayo 20, 2016 nga si Diano maoy tinuod nga presidente ug si Jimma Cimafranca ang kalihim sa PSCAI.

Sa resolusyon nga giluwatan ni Assistant City Prosecutor Aurora Ventura-Villamor niadtong Agosto 25, 2021, matud niini nga wala motubag ang mga sinumbong sa reklamong falsification bisan sa gipadala nga subpoena.

Tungod kay wala sila motubag sa pasangil nagtuo ang piskal nga nakahimo og kalapasan ang mga sinumbong.

“All the elements of the crime charged are present in the instant complaint for which both respondents must stand charged,” matud sa resolusyon nga aprobado ni City Prosecutor Mary Francis Daquipil.

Walay tubag ang Basak Police Station sa daghang tawag sa Banat News apan si Diano niasoy nga nakagawas na ang mga sinumbong human nakapiyansa og tag P24,000 niadtong Pebrero 3, 2022.

Matud ni Diano nga gidakop si Babon ug Aniel niadtong Pebrero 2, 2022 samtang naghusay og kaso sa barangay hall isip mga sakop sa lupong tagapamayapa.

Sila si Babon ug Aniel una na nga nalutsan og warrant of arrest niadtong Enero 2020 sa kaso sab nga perjury subay gihapon sa maong reklamo ug nagpadayon pa ang husay sa maong kaso hangtud karon. –IBM (BANATNEWS)