Mandaue padayon mipatuman sa “no vax, no entry” apan dili estrikto

CEBU, Philippines — Padayon gihapon nga gipatuman sa kagamanan sa Dakbayan sa Mandaue ang “no vaccination card no entry” sa mga establisamento nga nagsugod pa niadtong Nobiyembre 2021.

Kini ang gipadayag sa pangulo sa Business Permit and Licensing Office (BPLO) sa kagamhanan sa maong dakbayan nga si Atty August Lizer Malate. Hinuon si Malate miingon nga ang no vaccination card no entry sa mga establisamento dili lamang gayod estrikto nga gipatuman. Gipasabot niya nga nakita nila daghan na kaayo ang nagpabakuna nga Mandauehanon nga maoy hinungdan nga wala na lamang gayod mo-estrikto sa pagpatuman niini ang kagamhanan.

Samtang gitinguha karon sa kagamhanan ang pagbukas pa og dugang duha ka mga vaccination site aron pag atiman sa katawhan nga madasig sa pagpabakuna.

Gipadayag ni Dr. Ligaya Lakambini Dargantes, pangulo sa City Vaccination Operation Center nga naglakip karon sa gitinguhang vaccination site nga pagabuksan adto sa pribadong lugar sama sa mga mall. Di Dargantes miingon nga niadtong National Vaccination Day sa Nobyembre 2021,  nabakunahan kontra COVID 19  sa first dose nga bakuna ang 16,000 ka mga tawo ug gikatakda unta kining bakunahan sa second dose sa ikatulong semana sa Disyembre 2021 apan napakyas ang pagpamakuna tungod sa pag-igo sa bagyong Odette. MEL (BANATNEWS)