P50 milyones gisugyot alang sa pagpalit og tambal sa mga kabus

CEBU, Philippines — Gumikan sa pagnihit sa fever ug flu medicines sa mga botika karon ang Cebu City Government nihimo og lakang aron libreng makahatag og tambal sa katawhan sa siyudad ilabi na niadtong mga naglisod gyud sa kinabuhi.

Matod ni Atty. Gerry Carillo, Chairman sa Cebu City Disaster Risk Reduction and Management Council (CCDRRMC), ang siyudad mogahin og pundo aron ang 40,000 ka low income families mahatagan og libreng tambal.

Kini isip pre-emptive method ilabi na karon nga misaka ang kaso COVID-19 ug nakasulod na sa Central Visayas ang Omicron Variant.

Ang mga tambal nga ihatag langkuban sa paracetamol ug vitamins aron dunay proteksiyon batok virus. “Mao nay atong plano unya ni propose ta tomorrow nag propose ta og P50 million pag purchase niini and hopefully ang atong mga kaigsuonan nga mga low income families will be able to access this kind of medicines”, sigon ni Atty. Carillo.

Samtang si Dr. Jeffrey Ibones, Officer-in-Charge sa Cebu City Health Department miasoy nga ang ilahang buhatan nagsugod na og packing sa mga tambal aron ihatag sa mga nangihanglan.

Tumong sa Cebu City Government nga mahatagan og tambal ang mga nangasakit. “Atong gipili lang sa katong mga naa sa mga less fortunate katong mga naa ta gi- identify man na sa atong area nurse supervisor sa bukid unya diri kay naa man tay lima kabuok area, north, south, east, west, and central naa na sila’y mga area nurse supervisor mao na sila’y mo identify sa mga pobre gyud tawon nato nga kaigsuonan, sila atong i-prioritize, house to house ang distribution”, matud ni Dr. Ibones. —MEL (BANATNEWS)