Telcos giawhag nga dili pabayran ang mga adlaw nga way signal

CEBU, Philippines — Nihangyo si Cebu City Councilor Nestor Archival ngadto sa  telecommunications companies nga dili pabayran sa mga  konsumidor ang mga adlaw nga nawad-an sila og signal human gikuso-gikuso ang siyudad sa Bagyong Odette.

Gipabuhagay kini sa  konsehal pinaagi sa iyang privilege speech  sa miaging semana atol  sa regular session sa konseho .

Matud pa ni Archival nga medyo taas gyud ang mga adlaw  nga nasinati sa mga konsumidor ang walay signal ang mga telecommunication companies, apan nasayran nga naningil gihapon sila og bayad.

“Atol sa bagyo ,  nawala man gyud ang mga connection sa network . Nahunong gyud ang service so dapat maminusan na ang bill,” suma pa ni Archival.

Nagkanayon ang konsehal sa pipila sa mga nag-unang apektado niini mao kadtong naka-post paid. Gihangyo kini konseho nga labing  maayo nga bayaran lang kadtong mga adlaw nga duna pa kini koneksyon.

“Luoy man gud  kaayo ang mga tawo  nga wala kagamit sa ilang mga internet connection pero magbayad gihapon. It’s not fair,” dugang pa ni Archival. Tumong lang sa konsehal nga mahatagan kini og katin-awan busa ipatawag niya ang mga representante sa  mga telcos sa sunod nila nga session.

Gusto usab masayod ang konseho kun unsa na ang estado  sa ilang anam-anam nga pagbalik sa ilang mga koneksyon sa ilang linya.— IBM (BANATNEWS)