_banat
^

Banat Balita

Gatusan ka pasahero ug mga barko ang na-stranded

Rowena D. Capistrano - Banat
Gatusan ka pasahero ug mga barko ang na-stranded
Base sa talaan sa Philippine Coast Guard Station Cebu alas 11:30 sa buntag adunay 254 ka pasahero ang na-stranded; 46 ka vessels; 81 ka rolling cargo ug16 ka motorized banca.
STAR/File

CEBU, Philippines — Gatusan ka pasahero ug sakayan pangdagat ang na-stranded sa Central Visayas kagahapon tungod sa bagyong Odette.

Base sa talaan sa Philippine Coast Guard Station Cebu alas 11:30 sa buntag adunay 254 ka pasahero ang na-stranded; 46 ka vessels; 81 ka rolling cargo ug16 ka motorized banca.

Ang PGC Central Visayas niawhag sa mga mananagat nga dili usa mobiyahe niining mga panahona tungod kay dili maayo ang lakat sa panahon gumikan sa bagyo.

Giawhag usab ang mga biyahedor nga magpaminaw kanunay sa mga taho aron dili na sila mahasol pag-adto sa mga pier tungod kay walay gitugotan nga mga biyahe.

Subay niini, gipahibalo sa Cebu City Disaster Risk Reduction and Management Office nga gikan sa blue alert gipasaka na nila ngadto sa red alert  ang preparasyon sa  Siyudad sa Sugbo human hingpit na nga nisulod ang nasud ang bagyong Odette.

Ang personnel sa CCDRRMO full force kini ug walay gitugotan niini nga maka-leave.

Gipasuspenso usab ni Mayor Michael Rama ang mga trabaho sa city hall karong adlawa ug gidasig niya ang mga pribadong kompaniya nga mao usab kini ang buhaton.

Hinuon sa bahin sa city hall magpabilin ang mga departamento nga nakatutok sa kasamtangang sitwasyon sama sa Department of Social Welfare and Services.

"To all our citizens, be prepared. It pays to be Laging Handa! Again, establish your own Family Disaster Preparedness Plan that even your children and everyone in your household or compound know by heart”, matud ni Rama.

Samtang si Konsehal Jerry Guardo mapasalamaton sa pribadong sektor gumikan kay nitabang kini sa kagamhanan sa Siyudad sa Sugbo sa preparasyon alang sa bagyo.

Matud ni Guardo nga adunay pipila ka mga kompaniya ang mopahuwam sa ilang mga ekipo ug mga sakyanan aron mahimong gamiton panahon sa emerhensiya.

Padayon usab ang pagkubkob sa mga basurahan ug yuta nga niungot sa mga kanal ug sapa aron malikayan ang paglunop.

Giandam na usab karon sa kabaranggayan ang mga area nga maoy magsilbing evacuation sites.

Kaabag usab sa siyudad ang barangay responders, Bureau Of Fire Protection, Philippine Coast Guard, Philippine National Police, Armed Forces of the Philippines ug ubang ahensiya sa gobiyerno.

Nunot usab niini, kagahapon ubos na sa tropical cyclone signal wind number 2 ang Camotes Island sa Cebu, eastern portion sa Bohol sama sa Garcia Hernandez, Jagna, Sierra Bullones, Dagohoy, Talibon, Trinidad, San Miguel, Pilar, Duero, Guindulman, Anda, Candijay, Alicia, Mabini, Ubay, Bien Unido, Pres. Carlos P. Garcia ug daghang bahin sa Eastern Visayas ug Surigao areas.

Samtang nagpabilin nga signal number 1 ang ubang bahin sa Sugbo ug sa ubang areas sa Central Visayas base sa alas 5:00 sa hapon nga weather bulletin sa PAGASA kagahapon.

Matud sa state weather bereau nga nagkakusog ang hangin sa bagyong Odette nga naa sa 130 km/h ug pag-unos hangtud sa 160 kilometro matag takna.

Pipila sa mga lungsod ug dakbayan sa Probinsiya sa Sugbo ang nisuspenso sa trabaho sugod karong adlawa.

Ang mayor sa Dakbayan sa Danao Ramon Durano III niluwat og executive order pagsuspenso sa trabaho sa tanang local ug national government agencies sa siyudad sugod karong adlawa hangtud ugma gawas lang sa frontliners.

Sa Lungsod sa San Remigio suspendido usab ang trabaho sa tanang government offices ug private offices lakip na ang non-government organizations ug mga klase sa tanang skwelahan.

Sa Lungsod sa Daanbantayan gisuspenso usab ni Mayor Sun Shimura ang klase sa tanang level sa eskwelahan karong adlawa.

Si Neil Sanchez,  pangulo sa Provincial Disaster Risk Reduction and Management Office nagkanayon nga gawas sa Lungsod sa Sibonga nga maoy gihimo nga center of operations sa Probinsiya ni-coordinate na usab sila sa Danao DRRM aron mahimong sentro sa deployment sa mga ekipo ug personnel alang sa mga areas sa Northern Cebu.

Samtang ang Konseho sa Dakbayan sa Lapu-Lapu nideklara nga ubos sa state of preparedness ug ang Dakbayan sa Mandaue nideklara kini ubos sa blue alert

Sa lungsod sa Consolacion napulo  ka evacuation  center ang giandam nga kabalhinan sa mga molupyo nga naglakip sa multi-purpose  gym  sa  Barangay Tayud, Jugan, Pitogo, Pulpogan, Polog, Cabangahan,  Tolotolo, Garing, Lanipga, ug Laray.

Sa Dakbayan sa Talisay, ang grupo sa mga contractor ang andam mopagamit sa ilang mga tawo ingon man kagamitan kalambigitan.

Si Engineer Francis Gerard “Jigger” Cañedo, presidente sa Cebu Contractors Association Inc. nipadala og suwat ngadto kang Rama ug Gobernador Gwendolyn Garcia aron ipadangat ang ilang commitment of support sa lokal nga kagamhanan.

Gipadayag nila diha sa ilang suwat nga andam sila nga mopagamit sa ilang mga kagamitan ugaling adunay kinahanglang respondehan ingon man sa pag-deploy sa ilang mga tawo. —Sanden J. Anadia, Le Phyllis F. Antojado, Romeo T. Limpangog, Gabriel C. Bonjoc/BDB (BANATNEWS)

CENTRAL VISAYAS
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with