Mga driver nahinangop sa pagkunhod sa presyo sa produktong petrolyo

CEBU, Philippines — Gikahinangop sa mga drayber sa  taxi,  PUJ ug mga tricycle sa Dakbayan  sa Mandaue ang  pagpakunhod og kapin sa dos pesos matag litro sa presyo sa produktong petrolyo.

Matud pa nila nga madugangan gayod ang ilang kitaon sa pagpamasahero nonot sa pagkunhod sa presyo.

Si Terence Alinsug, 42 anyos taxi driver sa Consolacion miingon nga daku ang ilang kalipay karong pasko dili lang sa mga driver apil na usab ang mga konsumidor aron dili usab mosaka ang presyo sa mga palaliton sama sa mantika,  asukar ug uban nga hilabihan ang pagsulbong sa presyo karong panahona.

Susamang panahom usab ang gipadayag ni Carlos Quinaquing, 52 anyos nga PUJ driver sa Barangay Basak, Dakbayan sa Mandaue.

Matud pa niya nga dako kaayo ang nahanaw sa ilang kitaon sa matag adlaw nilang pagpamasahero kon itandi sa miaging mga bulan nga wala pa ang pandemic.

Gitataw niya nga naghinayhinay na unta sila sa pagpamalik og pamasahero apan tungod kay limitado man ang pasakyon maoy hinungdan nga daghan pa gihapon hangtod niining panahona ang nagkalisud. MEL (BANATNEWS)