Mga polis nga walay bakuna ibalhin og assignment

CEBU, Philippines — Sugdan na sa Cebu City Police Office (CCPO) ang pagbalhin sa ilang police personnel nga wala pay bakuna ngadto sa admin holding sa higayon nga pormal na nga maduso ngadto sa buhatan ang direktiba sa Philippine National Police (PNP) nga mo-relieve sa mga polis nga wala pa makapabakuna.

Si Police Lieutenant Colonel Wilbert Parilla, Deputy City Director for Operations sa CCPO nagkanayon nga nadungog na nila gikan sa national interview sa Chief PNP ang maong mga direktiba nga ang tanang personnel nga wala pa makapabakuna ibutang sa admin holding ug maghuwat na lang sila sa actual nga memorandum aron ilang maimplementar.

Nasayran nga 20 ka polis sa CCPO ang wala pa makapabakuna diin ang uban mabdos karon samtang ang uban adunay comorbidities.

Subay niini, si Mayor Michael Rama nipahibawo kabahin sa pagpatuman sa pagdili sa pagsulod sa mga dili bakunado sa mga establisemento sugod karong Enero 1, 2022 ug matud ni Parilla nga dili exempted ang mga polis niini. Matud ni Parilla nga maghuwat sila sa pormal nga memorandum aron masuta kon ang mga option sa pagpa-swab test sa mga walay bakuna nga trabahante sa pribadong sektor mahimo ba usab nga magamit sa mga polis.

Base sa post diha sa social media account sa kapolisan kagahapon si PNP Chief Police General Dionardo Bernardo Carlos nagkanayon nga i-reassign na lang ang wala pa makapabakuna nga mga polis sa “low risk” nga katungdanan aron makapadayon sila sa pagserbisyo.

Subay niini, gihangop sa Cebu City Emergency Operations Center ang mga mall sa siyudad gumikan sa dakong kooperasyon niini sa pagpabakuna sa ilang mga empleyado.

Sa dili pa matapos ang tuig posibleng ang 100 porsyento nga empleyado niini bakunado na.

Sa pagka-karon, mayoridad sa mga empleyado bakunado na batok sa COVID-19.

Samtang sa paglusad sa Cebu City Government sa ikatulong vaccination site alang sa Pediatric COVID-19 vaccination nanghinaot ang Cebu City Health Department nga mas daghan pang mga batan-on nga nag-edad og 12 ngadto sa 17-anyos ang magpabakuna.

Base sa datos sa Cebu City Health Department kapin na sa 21,000 ka batan-on ang nagpabakuna ug anaa na sa dul-an 3,000 ang nakakompleto na sa ilang bakuna.

Nasayran nga tinguha sa Cebu City Government nga makabakuna og 100,000 ka  batan-on. Sanden J. Anadia, Decemay P. Padilla/BDB (BANATNEWS)