Lider sa kulto gikasohan og two counts of rape

CEBU, Philippines — Usa ka giingong lider sa kulto gipasakaan sa National Bureau of Investigation-7 og kasong two counts of rape subay sa Akta Republika 8353 kun “Anti-Rape Law” in relation sa Akta Republika 7610 kun “Child Abuse Law” ngadto sa Provincial Prosecutor’s Office.

Ang suspetsado mao si Teodorico Feriol o naila nga “Brod Doring”, “Master” ug “Tatay”, usa ka giingong lider sa kulto ug faith leader ubos sa Higawnon Spiritual Consultation Services diha sa Udlom 2, Barangay San Isidro, Lungsod sa Austurias.

Matud ni Atty. Renan Oliva, direktor sa NBI-7 nga ang kaso napasang-at human ang duha ka babaye lakip niini ang menor de edad giingong gilimbongan sa suspetsado kinsa nangangkong siya ang Dios Amahan o God the Father nga makaayo sa sakit. Matud ni Oliva nga si Feriol giingong mopapuyo sa masakiton sa iyang mission isip spiritual obligation sa temple sulod sa pipila ka gabii diin adto niini himuon ang iyang sexual exploitations sa mga biktima.

Giingong daghan na ang mga taho kabahin sa sexual abuse nga gihimo ni Feriol ngadto sa kababayen-an ug kabataan ug uban sa mga biktima namabdos kini.

Ang NBI-7 maoy nitabang sa mga biktima ni Feriol ug niawhag usab sa mga ubang nabiktima sa suspetsado nga modangop sa ilang buhatan aron sila matabangan. —BDB (BANATNEWS)