Garcia gi-cleared sa Korte Suprema sa Balili case

CEBU, Philippines — Gipaborban sa Korte Suprema ang desisyon sa Court of Appeals sa 2014 nga desisyon niini nga nag-cleared kang Gobernador Gwendolyn Garcia sa kasong administratiba nga unang gidesisyonan sa Ombudsman diin dili kini pabor kang Garcia  kalabotan sa Balili case.

Ang Korte Suprema nihimo og desisyon niadtong Septiyembre 14, 2021 apan gipublikar kini niadtog Nobiyembre 24, 2021.

Ang kasong grave misconduct nga gisang-at batok kang Garcia na-file kini niadtong tuig 2011 tungod sa pagpalit sa Kapitolyo og luna sa Dakbayan sa Naga nga gipanag-iya sa pamilyang Balili.

Dihang gisang-at ang kaso batok kang Garcia ang condonation doctrine epektibo pa kini.

Ang condonation doctrine nagpasabot nga mawala ang liability sa usa ka elected officials sa kaso niini kon mapili kini og balik sa eleksiyon.

Apan niadtong Abril 2016 gibasura na sa Korte Suprema ang condonation doctrine.

Human gikasohan si Garcia sa Ombudsman ang kampo niini nihagit kini sa ruling sa Ombudsman ngadto sa Court of Appeals diin ang maong ahensiya nipabor kaniya.

Ang Ombudsman kinsa nidesisyon kang Garcia nga guilty sa grave misconduct nisang-at sa kaso ngadto sa Korte Suprema.

 Ang Korte Suprema nagkanayon nga “verily, it is incorrect for the OMB to argue that the condonation doctrine merely erases the penalty and not the offense. To repeat, the condonation doctrine obliterates the offense and consequently the liability as well”.

Sa 12 ka pahina nga ruling sa Korte Suprema nagkanayon nga tungod kay ang kaso nga na-file batok kang Garcia nahitabo sa panahon nga epektibo pa ang condonation doctrine ang gobernador ma-cover pa o maka-avail pa sa maong doktrina pagdepensa sa iyang kaso.

Ug gumikan niini gibasura sa higher court ang petition sa Ombudsman ug ni affirm sa desisyon sa Court of Appeals pabor kang Garcia. BDB (BANATNEWS)