Vendors nisumetir og proposals sa pagpahigayon sa night market
CEBU, Philippines — Gibutyag sa pangulo sa Prevention Restoration Order Beautification Enhancement (PROBE) Raquel Arce nga ang vendors nisumetir na og proposal alang sa pagpahigayon sa night market ug niadtong Lunes gipahigayon usab nila ang meeting sa opisyales sa nagkalain-laing vendors association.
Gihangop sa PROBE ang proposal sa vendors apan giklaro ni Arce nga ilaha pa kining i-refer kang Cebu City Mayor Michael Rama ingon man sa Emergency Operations Center Cebu City pinangulohan ni Konsehal Joel Garganera kon posible ba nga ipahigayon karong tuiga ang night market.
Ang proposal sa vendors sa night market mao nga pahugtan nila ang pagpatuman sa health protocols sama sa social distancing, hygiene ug hustong pagsul-ob face mask.
Gisugyot sa vendors ngadto sa kagamhanan sa siyudad nga magsugod sila og pamaligya sa alas 6:00 sa gabii hangtud sa alas 3:00 sa kadlawon.
Si Arce nagkanayon nga nasayod na ang vendors kon unsa kahugot ang PROBE sa pagpatuman sa health protocols ug usa kini sa rason nga ang tanang vendors nga moapil sa night market kon ugaling tugotan nga ipahigayon mopaubos og briefing sa dili pa magsugod sa pagpamaligya.
Gipahibawo usab ni Arce nga gisugyot usab sa vendors nga ang makaapil sa night market kadtong mga fully vaccinated lang.
Sa niaging tuig wala tugoti ang night market sa kagamhanan sa siyudad gumikan sa hulga sa COVID019.
Ug kong ugaling tugotan ang night market niining tuiga anha kini ipahigayon sa dalan Colon. BDB (BANATNEWS)
- Latest
