Vaccination sites gidagsa

CEBU, Philippines — Moabot sobra 25 mil ka tawo ang nabakunahan sa Cebu City sa unang adlaw sa 3-Day National Vaccination program sa gobiyerno nga gisugdan niadtong adlaw nga Domingo. Mas ubos kini sa target nga 32 mil ka tawo kada adlaw ang bakunahan.

Apan gihulagway ni Cebu City Mayor Michael Rama nga dako gihapon kini nga kalampusan para sa unang adlaw.

Matod ni Rama naa ra sa 11,000 ra ang pinakadaghan nga nabakunahan sa siyudad kaniadto.

“Ang pinaka importante with what has been achieved, we are adding up on our data, data of nearly reaching what we wish to accomplish which is the herd immunity,” sigon pa ni Rama.

Sigon sa Officer-in-Charge sa Cebu City Health Department Dr. Jeffrey Ibones naablihan gyud nila ang 90 ka vaccination sites nga ilang giandam alang sa maong kalihukan.

Giangkon ni Dr. Ibones dunay mga kakulian nga nasugatan sama sa internet connections, pagkaon nga nadugay og abot, mga doctors ug encoders nga nadugay og adto sa vaccination sites.

Ang Cebu City gihatagan sa Department of Health og 100,000 doses sa COVID-19 vaccines alang sa tulo ka adlaw nga kalihokan sa pagpamakuna.

Masaligon sab si Ibones nga makuha sa siyudad ang herd immunity sa dili matapos ang buwan sa Disyembre kay bisan og mahuman na ang National Vaccinations Days magpadayon lang gihapon ang pagpamakuna.

Hinuon gibutyag ni Ibones nga duna pay unom ka barangay ang wala pa makaduso sa ilang report sa gidaghanon sa ilang nabakunahan tungod sa kakulian sa internet connection.

Sa pikas bahin, ang Dakbayan  sa Lapu-Lapu malaumon sab nga makab-ot ang 90 porsiyento sa ilang populasyon ang ma fully vaccinated human aning national vaccination drive.

Ang siyudad nangabli og 17 ka mga vaccination sites par niini. Si  Mayor Mayor Junard “Ahong” Chan miingon nga target nilang makab-ot ang “herd immunity” karong Pasko.

Karon palang, masaligon siyang makuha na nila ang 70 porsiyento sa populasyon nga makompleto og bakuna batok Covid-19.

 Sa Dakbayan  sa Mandaue, gikahimuot sa mga opisyales sa siyudad ang paghangop sa mga Mandauehanon sa vaccination drive  diha sa kabarangayan.

Hinuon dili sama kadako sa Cebu City ang ilang target mabakunahan matag adlaw tungod kay 7,500 matag adlaw ra ilang target apan nilapas na og 9 mil sa unang adlaw nga pagpamakuna.

Samtang nidoble ang ihap sa mga tawong nabakunahan batok Covid-19 sa Dakbayan sa Talisay sa unang adlaw sa vaccination drive sumala pa ni Dr. Rey Cesar Bautista sa City Health Office.

Ang siyudad nakabakuna og 8,165 ka Talisaynon apil niini ang mga 12-anyos hangtud 17-anyos nga nagpabakuna.

Si Police Lt. Col. Randy Caballes, pangu sa kapulisan nitataw nga gilauman nila nga mas modaghan pa ang tawo ilabi na nga holiday karon.

Susamang sitwasyon sab ang nahitabo sa Lungsod sa Consolacion  nga gidagsa sab ang mga vaccination sites sa unang adlaw nga miingon nga 104 porsiyento ang pagsaka sa gidaghanon sa mga nagpabakuna sa unang adlaw sa vaccination drive kagahapon.

Si Mayor Joannes “Joyjoy”  Alegado mibutyag nga gimandoan sila sa Department of Health (DOH) 7  nga 6,180 kada adlaw ang ilang mabakunahan, apan sobra og 241 ka ka tawo sa target ang ilang nabakunahan kagahapong adlawa. –Gabriel Bonjoc, Rowena Capistrano, Romeo T.  Limpangog/IBM (BANATNEWS)