Gipahimungtan

Lalaking gipasanginlang maoy nagsugod sa sunog sa Sitio Lawis, Brgy. Mambaling sa Dakbayan sa Sugbo niadtong Biyernes sa hapon gikulata, gibunal-bunalan ug gipusil sa mga naglungot-lungot nga mga silingan.

Ang nalandig sa tambalanan mao si Rolly Siso, 39, kinsa nagpuyo sa panimalay nga gipanagiya sa usa ka Marlyn Sitoy nga gipuy-an sab sa usa ka Ernie Maravillas kun diin giingong nagsugod ang sunog.

Base sa nakuhang impormasyon sa Banat News gikan sa mga nasunogan, iyaan ni Siso ang tagiya sa panimalay ug naghimo kini og ‘kubol-kubol’ aron puy-an.

Si Siso gipahimungtan sa mga tawo kay diha nagsugod sa gipuy-an niini ang sunog ug gikatahong gisuwayan na sab niini sa pagsunog ang iyang gipuy-an kaniadto apan nagtinabangay ang mga silingan pagpawong niini.

Napriso na kini kaniadto ug gipasanginlan sab nga tiggamitan og illegal nga drugas.  Siya kadtong tawong naa sa video footage sa social media nga gibanos-banosan og puspos, kulata ug labay og bato sa mga wala mailhing tawo samtang kini nalukapa sa tubig duol sa fire scene.

Nakaangkon kini og samad pinusilan sa tuong bahin sa lawas, mga bun-og sa kalawasan ug sa ulo ug naa karon sa tambalanan.

Nahunong lang ang pagpangulata sa dihang gikuha kini sa mga sakop sa Special Weapons and Tactics diha sa lapukong kadagatan duol sa nasunogan.

Si Fire Officer 2 Fulbert Navarro, Cebu City Fire Department Investigator miingon nga naghimo pa sila karon og imbestigasyon sa hinungdan sa sunog.

Apan tungod sa pagkasikop kang Siso siya maoy gitutokan sa imbestigasyon karon.                               

641 BALAY                      

Sa pagkakaron, gipahimutang sa 27 ka mga lawak-saringan sa Alaska Elementary School ang mga nasunogan, matud pang Harold Alcontin, ang operation chief sa CDRRMO nga nahinabi sa Banat News.

Dili mominos lima ngadto sa unom ka pamilya ang anaa gibutang matag lawak. Duna na say gipamutang mga portable nga mga pansayan alang sa mga babaye ug lalaki lakip na sab kaligoanan.

Base sa talaan sa kabomberohan, giingong dili mominos sa 300 ka mga panimalay ang naugdaw ug 1,500 ka individual ang apektado sa maong sunog.

Apan sa talaan sa talaan sa DSWS, 700 ka pamilya ang naapektahan sa sunog nga gilangkuban og 3,107 ka indibidwal.

Niabot usab ngadto sa 641 ka panimalay ang naugdaw sa maong hitabo. Gibana-bana nga mokabat sa P875 mil ang danyos niini.

Samtang lima ang gikatahong naangol lakip na si Siso, kinsa maoy gidudahang maoy hinungdan sa sunog. an.

Coastal area

Si Mayor Michael Rama mipatawag og special session karong adlawa, Nobiyembre 28,2021 aron madeklarar nga ubos sa state of calamity ang maong barangay.

Gusto ni Rama nga hatagan og cash assistance ang mga nasunogan. Si Konsehal Raymond Alvin Garcia miingon nga dili sila makapagawas og pundo calamity funds kun walay deklarasyon og state of calamity.

Gawas sa cash assistance, ang siyudad mohatag sab og building materials ug pagkaon.

Apan gusto ni Rama nga tutokan ang daplin sa dagat kun tugotan pa ba silang makatukod pagbalik didto.

“We will have to see to it because we do not want a repeat. Tukuran gihapon sila, pagkahuman sunog na sad? Unsa man na? We have to bring them to be a part of the solution,” matud niini.

Gikatakdang makigkita si Rama sa mga residente uban sa mga lider sa barangay bahin niini.

“Number one instruction nako is simple. Until everything is in control, no going back, unless they will be retrieving something. But no construction will be made, no fencing permit be issued,” matud niya.

Si Barangay Mambaling captain Gines Abellana mipahibalo nga duna pa silay P200 mil calamity fund nga magamit.

Samtang kadtong buot motabang mahimong adto nila kini dad-on sa barangay hall aron ma-repack.— Mary Ruth R. Malinao (BANAT NEWS)