Manipis sirad-an na usab og 2 ngadto sa 3 ka bulan

CEBU, Philippines — Molanat na usab og duha ngadto sa tulo ka buwan una paagian og balik ang karsada sa Barangay Manipis, Dakbayan sa Talisay.

Kini ang gibana-bana ni kapitan Joselito Laurente samtang padayon nga gitrabaho ang benching sa kabukiran.

Siya nagkanayon nga ang mga residenti lang una ang ilang gitugotan nga moagi sa dapit apan kinahanglan kanunay nga magmatngon.

Matud pa ni Laurente nga aduna gihapon pagpangliki sa kabukiran nga gikabalak-an nga makamugna og dakung landslide.

“Dili pa gyud ta kaingon nga wala nay landslide mahitabo kay naa pay dagko nga pagpangliki nga naa sa ibabaw,” sigon pa sa kapitan.

Kahinumduman nga pipila na ka higayon nga gisirad-an ang nahisgutang karsada tungod sa pagdahili sa yuta ug mga bato.

Ang karsada sa Manipis sumpay ra sa mopaingon sa Syudad sa Sugbo, Toledo ug Naga.

Nanghinaut ang kapitan nga unta masabtan ra sa mga motorita ang ilang gihimong pagsirado sa karsada gumikan kay alang ra usab kini sa kaayuhan sa kinabag-an.