P3 milyones nga balor sa wheelchair ug mga tambal gidonar sa PCSO
CEBU, Philippines — Dili mominus sa tres milyones pesos nga balor sa wheelchair ug mga tambal ang gipang-apod-apod sa Philippine Charity Sweepstakes Office (PCSO) ngadto sa 81 ka mga Barangay sa dakbayan sa Sugbo ug ubang mga silingang lugar.
Kagahapon (Huwebes), si PCSO General Manager Royina Garma maoy personal nga nangulo sa turnover ceremony sa dakbayan sa Sugbo.
Matud ni Garma, sukad nagsugod ang pandemya, nakadawat na sila og hangyo alang sa suporta gikan sa Cebu City alang sa pagtubag sa COVID-19.
“Bumalik lang kami kasi may mga request din yung mga Barangay officials and other municipalities for medicines and other maintenance, wheelchairs and other provisions pa," matud pa ni Garma.
Dugang pa niya, ang turnover niini sa mga hinabang gihimo sa tibuok nasud isip tubag sa hangyo sa mga barangay ug sa mga lungsod.
Ang mga wheelchair nga gihatag sa PCSO, ihatag usab ngadto sa mga benepisyaryo nga pilion sa matag barangay, samtang ang uban ibutang sa mga barangay health center.
"Ang purpose natin is para naman may gamot ang mga Barangay, para kung humingi yung mga taga doon, ay may malalapitan, mga basic maintenance medicine ito,"matod ni Garma.
Suma pa ni Garma nga ang pundo nga gigamit sa maong mga donasyon naggikan tanan sa kita sa mga mutaya o mopusta sa mga numbers game sa PCSO.
Dugang niya, mao sab kini ang mahimong resulta kung ang mga local government units (LGU) musuporta gayod sa PCSO nga makita sa mga hinabang nga ipanghatag nila ngadto sa kumunidad. —MEL (BANATNEWS)
- Latest