Magpabakuna sa Probinsiya sa Sugbo hatagan og bugas ug vitamins
CEBU, Philippines — Ang Probinsiya sa Sugbo mohatag og tagduha ka kilong bugas sa mga bag-ong bakunado batok COVID-19 nga mga indibidwal nga moapil sa Bayanihan, Bakunahan National COVID-19 Vaccination Days sa Nobiyembre 29 hangtud sa Disyembre 1, 2021.
Base kini sa memorandum nga giluwatan ni Gobernador Gwendolyn Garcia niadtong Nobiyembre 24, 2021 ngadto sa mga mayor sa nagkadaiyang lungsod ug dakbayan sa probinsiya apil usab ang mga barangay kapitan.
Lakip sa ihatag sa Kapitolyo ang usa ka bulan nga supply sa vitamin C with zinc ug vitamin B complex.
Samtang ang kagamhanan sa Dakbayan sa Lapu-Lapu gitahasan kini sa pagbakuna batok COVID-19 sa Regional Vaccination Operations Center og 12,600 ka tawo matag adlaw sulod sa tulo ka adlaw nga pagpamakuna atol usab sa tulo ka adlaw nga vaccination day holiday.
Si Dr. Mary Jean Loreche, tigpamaba sa RVOC-7 nagkanayon nga dako ang maong quota.
Giklaro ni Loreche nga ang maong quota apil na niini ang mga nakadawat sa first dose.
Sa laing bahin, gisugdan na kagahapon sa kagamhanan sa Dakbayan sa Danao ang pagpamakuna sa mga batan-on nga nag-edad gikan sa 12 ngadto sa 17-anyos.
Atol sa pagpamakuna walay walk in nga dawaton gawas sa Person With Disabilitiess.
Ug gumikan kay pilot launching pa man ang pagpamakuna limited slots lang una ang giablihan kagahapon ug karong adlawa.
Ang kagamhanan sa siyudad mopahibalo usab kini kanos-a mobalik ang schedule sa registration alang sa pediatric population.
Ang mga ginikanan nga mo uban sa ilang anak nga magpabakuna gipahinumduman nga dili magdala og mga bata nga nag-edad og 11-anyos paubos diha sulod sa vaccination site. —Romeo T. Limpangog, Rowena D. Capistrano/BDB (BANATNEWS)
- Latest