Proteksyon sa mamumuo, OFWs prayoridad ni Tulfo
CEBU, Philippines — Gitinguha ni media personality ug senatorial aspirant Raffy Tulfo ang pagpanday og balaudnon nga manalipod sa mga katungod sa mga gagmay’ng mamumuo nga naglakip sa Overseas Filipino Workers (OFW) ug mga kabus nga pamilya.
Matud pa niya iyahang himuong prayoridad ang maong mga pandayong balaudnon kun siya mapili pagka-senador sa Pilipinas kay nakita niyang pirmeng alaot ang mga gagmay ug kabus nga mga Pilipino, hasta kadtong mga nanarbaho sa abroad nga gipangabusaran sa ilang mga agalon ug gipasagdan sa ilang mga employment agencies.
“Ang aking priority bills ay tungkol po sa ating manggagawa, kasi sila yung parating nadedehado, napupurnada pagdating po sa batas. Pangalawa po yung ating mga OFWs at mga poor families,” nagkanayon si Tulfo atol sa iyang pagduaw dinhi sa Sugbo ning semanaha.
Gikutlo ni Tulfo ang mga panultihon ni anhing presidente Ramon Magsaysay nga nag-ingon nga “those who have less in life should have more in law.”
Giangkon ni Tulfo nga sa tulo ka dekada niyang panerbisyo sa media nga naglakip sa pagtabang sa mga kabus ug dinaugdaog, nakita niya nga alkanes gyud pirme ang mga gagmay.
“There are things that I can give agad-agad, pero may mga bagay-bagay na hindi natin maibigay being a private citizen,” matud niya. Ug ang nakita niyang solusyon mao ang pagpasar og mga balaod para sa mga gagmay.
“Make major surgery to pass legislations to address the root cause of the problem. I will level the playing field to give our poor people a fighting chance,” matud ni Tulfo kinsa daghan ng natabangan pinaagi sa iyang programang “Raffy Tulfo in Action.”
Si Tulfo nidagan nga independente apan abli siya pagdawat nga mahimong guest candidate sa mga ubang partido. Matud niya, importante lang kaniya nga dunay usa o duha sa adbokasiya ang mangimbitar nga partido nga kaparehas sa iyahang adbokasiya.— IBM (BANATNEWS)
- Latest
