Mga tinun-an sa kolehiyo kinahanglang mabakunahan
CEBU, Philippines — Daghang mga tinun-an sa kolehiyo dinhi sa Dakbayan sa Sugbu ang wala pa nakadawat og bakuna kontra coronavirus disease (COVID)-2019 ug gikinahanglan kini nila kun pananglitan mabalik na ang face to face classes.
Tungod niini ang Commission on Higher Education (CHED) matod pa nakig-layon sa Cebu City Health Department aron mabakunahan ang mga tinun-an. Apan sigon pa ni Dr. Jeffrey Ibones, Officer-in-Charge sa Cebu City Health Department kun naa dinhi sa siyudad nagtungha ang tinun-an pwede sila mabakunahan.
Ang pangutana karon kun kining tanang mga tinun-an nga nagtungha sa dakbayan, nagpuyo ba dinhi sa siyudad karong mga panahona.
Matud pa ni Ibones kun ang CHED magpabakuna sa mga tinun-an mangayo sila sa CCHD og masterlist sa mga bakunahan. Kini aron mapreparar sa CCHD kun pila ka buok ang bakunahan ug aron sab matandi nila kini sa listahan sa dakbayan sa mga nabakunahan na aron dili mag-doble.
“Mahibawo ta sa atong target pila atong target kay kung moingon kag 65,000 kung tinood na siya 65,000 naa tay siyam ka site ang atong usa ka site mokuha og 1,500 kapin or naay uban 2000 kanang 65,000 makuha rana nato og a week or ingon nato di kaabot 10 days unya ato sad tan-awon kung na registered sila sa atong Vaccine Information Management System(VIMS) importante gyud kaayuo ma registered sila kay para mapaspas ta,” ni Ibones pa.
Sa pagkakaron, ang siyudad adunay abundang supply sa COVID-19 vaccine kay duna may nangabot nga Pfizer, Sinovac ug uban pang bakuna sa dakbayan.
Alang kang Ibones, importante gyud nga mabakunahan ang mga tinun-an ilabi na nga gitinguha sa nasudnong kagamhanan nga ibalik ang face to face classes.
“Kung dili nato sila mabakunahan dili sila ka open kay dako og posibilidad nga magkatinakdanay, In fact gani kung moadto ta og menteryo kinahanglan ang bakuna, unsa pa kaha ng eskwelahan,” matud pang Ibones. —/IBM (BANAT NEWS)
- Latest
