Sobra sa 18K ka minors nalista nga magpabakuna sa Mandaue

CEBU, Philippines — Mokabat na sa 18,282 ang mga minor nga nagpalista alang sa pagpabakuna atok sa COVID-19 sa Dakbayan sa Mandaue.

Suma pa ni Dr. Ligaya Lakambini Dargantes ang pangu sa vaccination operation center sa siyudad nga ning semanaha misaka na ang nagpalista nga 12 ngadto sa 17 anyos.

Si Dargantes nga mao usab ang pangulo sa patient care and management team sa city's emergency Operations Center (E0C) miingon gihimo nila ang house to house visitation ingon man ang online registration hinungdan nga daghan ang nagpalista.

Gilakip na usab nila sa paglista ang mga bata nga nag-edad og hangtod na sa 11 anyos.

Dugang pa ni Dargantes nga gilakip usab nila sa paglista ang minors nga mibalhin na og puyo sa Dakbayan sa Mandaue gikan sa laing local government unit.

Nasayran nga karong adlawa Oktubre 15, 2021 gikatakda nga sugdan sa metro manila ang pagbakuna  sa mga nagpanuigon og 12 ngadto sa 17 anyos nga adunay comorbidities.

Suma pa ni Dargantes nga sa pagkakaron wa pa sila makadawat og advise gikan sa Department og Health  kun kanus-a sila magsugod sa pagpamakuna sa mga minor sa dakbayan. (BANAT NEWS)