32 ka sakyanan gi-clamp sa CCTO
CEBU, Philippines — Mikabat sa 32 ka sakyanan ang gi-clamp sa mga tinugyanan sa Cebu City Transportation Office (CCTO) sud lang sa usa ka gabii gumikan sa illegal parking.
Ang CCTO nihimo og operasyon sa pipila ka kadanan sa unom ka brgy sa Dakbayan sa Sugbo niadtong miaging gabii. Kini naglangkob sa barangay Tinago, San Roque, T. Padilla, Tejero, Hipodromo ug Carretta.
Subay niini pabiling nanghinaut ang CCTO nga mokooperar ang mga motorista sa kampanya sa kagamhanan kalabot sa pagtangtang sa mga nakabalda diha sa kadalanan.
Una na nga gitataw sa maong traffic agency nga walay exempted sa mga sakyanan nga i-clamp kun gipataka kini og parking.
Samtang kagahapon sa buntag, mihimo usab og operasyon ang CCTO didto sa Labangon paingon sa Tisa kun diin naka-isyu sila og 16 ka citation tickets alang sa violators nga walay helmet, walay brake light ug uban pa.
Sa maong higayon naka-impound pud sila og 5 ka trisikol ug duha ka motorsiklo nga walay mga prangkisa ug expired ang rehistro. —MEL (BANATNEWS)
- Latest