Mga supak sa modernisasyon sa Carbon di tinuod nga mga vendors

CEBU, Philippines — Gibutyag sa hepe sa Cebu City Market Operations Division (MOD) nga si Irvin Cabales nga ilang nadiskubrehan nga kasagaran sa mga misalmot sa mga lihok protesta batok sa modernisasyon sa Carbon Market dili mga tinuod nga vendors sa maong merkado.

“Sa tinoud lang , maihap ra gyud ang grupo nga nisupak sa modernisasyon sa merkado , hinuon bukas ra gyud ang atong opisina sa pagpasabot kanila. Kay sa pagka karon , wala pa gyuy nianhi sa office nga miingon nga dili sila uyon sa proyekto,” matud pa ni Cabales. 

Matud pa ni Cabales nga duna pu’y mga militante nga nisagol sa maong protesta nga dili  mga tinuod nga vendors.

Nagpadayon ang pagapud- apod ang MOD og certificate of recognition alang vendors nga mao kini ang garantiyang duna gyud silay puwesto sa bag-ong merkado.

Matud pa niya nga mahatagan gyud ang tanang vendors sa maong certificate. Hingpit usab nila nga giimplementar nga  ipahimutang gyud ang vendors sa temporaryong area  sa dili pa himoon demolisyon  sa ilang karaang tindahan.

 Nagpasabot kini nga dili gyud mahunong ang panginabuhian sa vendors samtang nagpadayon ang konstruksyon sa modernong merkado.

Matud pa ni Cabales nga walay puas ang regular nga panagtigom tali  sa mga vendors ug sa Megawide Construction Corp. alang sa lapad nga pagpasabot sa proyekto.

 Sa nangaging pamahayag ni  Louie Ferrer, chief corporate affairs and branding officer sa Megawide nga duna sila’y bukas nga komunikasyon  ngadto sa  vendors ug kanunay gyud nila nga atimanon ang mga pangutana ug uban pa nga mga concern niini.

Una na nga gitataw niini nga ang kagamhanan sa siyudad gihapon ang magpabiling operator sa merkado. —IBM (BANATNEWS)