Tropang Giga dili mokompiyansa

CEBU, Philippines — Ang TNT Tropang Giga nakapokus sa nahibilin nilang mga duwa sa elimninasyon bisan og hingpit na silang naka-angkon sa luna sa Top 2 sa nagpadayong 46th PBA Philippine Cup didto sa DHVSU gym sa Bacolor, Pampanga.

Human gibuntog ang NorthPort Batang Pier niadtong Miyerkules, 102-92, gipahugtan sa Tropang Giga ang ilang pagkupot sa solong liderato bitbit ang 9-1 win-loss record.

Labaw sa tanan, nagseguro kini kanila og twice-to-beat advantage sa quarterfinals.

Apan alang ni TNT coach Chot Reyes, dili kini mamahimong rason aron mokompiyansa ang iyang puwersa ilabi na kay layo pa kaayo sila sa buot nilang makab-ot ning komperensiya.

“In any tournament you want to grab any advantage that you can, so all that this means for us is that we have an advantage. But that advantage is not gonna win us anything if we don't take advantage of [it]," dason pa ni Reyes human sa ilang kadaogan sa NorthPort.

“Yes of course, we'd rather be twice to beat than need to beat somebody twice but like I said, the job is far from over, it's nice to be in the position we're in but we're still a long ways, this tournament is still a long ways from being done," dugang pa ni coach Chot.

Sa miaging season, twice-to-beat gihapon ang TNT sa quarterfinals. Nakalingkawas man tuod sila sa Alaska Aces apan napakyas sila paglangkat sa kampiyonato human gipiog sa Barangay Ginebra Kings sud sa lima ka duwa.

Wala pa hinoon niadtong tungora si Reyes uban sa TNT nga gidala pa ni Bong Ravena.

Mao kini ang hinungdan nganong ang Tropang Giga mobanat gihapon taman sa ilang ginhawa sa katapusan nilang duha ka duwa, apil na niini batok sa Alaska karong Domingo.