Kapolisan nangandam sa seguridad sa bar exam

CEBU, Philippines — Nagpahigayon og coordination meeting ang kapolisan kauban ang Supreme Court ug ubang mga security agencies alang sa umaabot nga Regional Bar Examination nga ipahigayon sa tibuok Domingo sa buwan sa Nobiyembre niining tuiga diha sa tulo ka unibersidad sa Dakbayan sa Sugbo.

Kini ang gibutyag ni Police Lieutenant Colonel Wilbert Parilla, deputy director for operations sa Cebu City Police Office.

Matud ni Parilla nga ang bar exam ipahigayon diha sa UC Banilad, University of San Carlos, ug University of San Jose Recoletos. Gibutyag usab ni Parilla nga padayon karon ang ilang pagpangandam alang sa kalamposan sa maong kalihokan diin nagpaabot nalang sila sa final guidelines nga luwatan sa Supreme Court nga maoy ilang tamdan.

Giingong ang maong Regional Bar Exam dako kini og tabang sa mga taga Mindanao ug Visayas tungod kay dili na sila moadto sa kaulohan aron mo-take sa bar exam.

Dugang ni Parilla nga dili hinuon kaayo daghan ang ilang gipaabot nga mokuha sa bar exams dinhi sa Sugbo tungod kay adunay bar exam ipahigayon usab ang bar exam sama sa Dumaguete, Bacolod, Iloilo ug uban pa. —BDB (BANATNEWS)