Kaso sa dengue sa Talisay nikunhod

CEBU, Philippines — Menos ang kaso sa dengue sa Dakbayan sa Talisay karong tuiga ikompara sa niaging tuig.

Base sa report sa siyudad nga gikan sa buwan sa Enero hangtud sa Agosto 7 niining tuiga  70 lang ang ka kaso sa dengue sa Dakbayan sa Talisay diin ubos kini ikompra sa niaging tuig nga 165 ka kaso.

Hinuon aduna pay nahabilin nga mga buwan nga kwentahonon.

Ang kagamhanan sa siyudad nag-monitor kini sa kaso sa dengue ilabi na nga nisulod na ang panahon sa ting-uwan.

Matud ni Mayor Gerald Anthony “Samsam” Gullas Jr. nga bisan og nagpadayon ang pagpamakuna batok sa COVID-19 dili nila pasagdan ang ubang aspeto sa pagserbisyo.

Iyahang ipasusi kong asa nga barangay ang daghan og kaso sa dengue aron mao kini ang prayoridad sa pag-misting.

Nasayran nga naabot na ang dugang supply sa kemikal ug spray gun nga gamiton sa misting operation.

Si Konsehal Richard Francis “Ricky” Aznar, tsirman sa komitiba sa panglawas nagkanayon nga ang pagtuman sa 4 o’clock habit ug paglimpiyo sa palibot maoy usa sa paagi sa batok sa dengue.

Nagtuo si Aznar nga ang pagkunhod sa kaso tungod sa pag-amping sa katawhan ug ang opisyales sa siyudad padayon usab ang kampaniya aron malikayan ang dengue. —BDB (BANATNEWS)